សមយុទ្ធយោធារួមគ្នាទ្រង់ទ្រាយធំដឹកនាំដោយរុស្ស៊ី ត្រូវបានធ្វើឡើងនៅប្រទេសអាស៊ីកណ្តាល, តាជីគីស្ថានក្បែរព្រំដែនប្រទេសអាហ្វហ្គានីស្ថានដើម្បីពង្រឹងសន្តិសុខក្នុងតំបន់កាលពីថ្ងៃសៅរ៍។នេះបើយោងតាមការសែតNHKចេញផ្សាយនៅថ្ងៃទី២៤ខែតុលាឆ្នាំ២០២១។
ការសែតNHKបានផ្សាយថាអង្គការសន្ធិសញ្ញាសន្តិសុខរួមឬCSTO បានធ្វើសមយុទ្ធយោធារួមគ្នារយៈពេលប្រាំមួយថ្ងៃនេះមានកងទ័ពចូលរួមសរុបចំនួន ៤,០០០ នាក់។
អង្គការCSTO គឺជាសម្ព័ន្ធភាពយោធាដឹកនាំដោយរុស្ស៊ី ដែលមានប្រទេសជាអតីតសហភាពសូវៀតចំនួន៦ជាសមាជិក។
ការសែតខាងលើដដែលបានបន្តថាសមយុទ្ធនោះគឺផ្អែកលើសេណារីយ៉ូនៃការលុកលុយដោយក្រុមជ្រុលនិយមពីភាគខាងជើងអាហ្វហ្គានីស្ថាន។ ការឆ្លើយតបទៅនឹងការវាយប្រហារដោយយន្តហោះគ្មានមនុស្សបើក(ដ្រូន)របស់សត្រូវក៏មាននៅក្នុងរបៀបវីរៈនៃសមយុទ្ធនាពេលកន្លងទៅនេះផងដែរ។
លោក Sherali Mirzo រដ្ឋមន្ត្រីក្រសួងការពារជាតិតាជីគីស្ថានបានចង្អុលបង្ហាញពីការកើនឡើងនៃសកម្មភាពរបស់ក្រុមអ៊ីស្លាមជ្រុលនិយមនៅក្នុងប្រទេសអាហ្វហ្គានីស្ថាន។
លោកបានសម្តែងការព្រួយបារម្ភយ៉ាងខ្លាំងថា អាហ្វហ្គានីស្ថានកំពុងក្លាយជាកន្លែងក្តៅគគុកសម្រាប់ក្រុមភេរវករពិភពលោក ដែលបង្កការគំរាមកំហែងយ៉ាងធ្ងន់ធ្ងរដល់សន្តិសុខ និងស្ថិរភាពក្នុងតំបន់។
រុស្ស៊ីព្រួយបារម្ភអំពីអស្ថិរភាពដែលអាចកើតមាននៃបណ្តាប្រទេសអាស៊ីកណ្តាលដែលមានទីតាំងភូមិសាស្រ្តនៅជុំវិញអាហ្វហ្គានីស្ថាន។ ក្នុងចំណោមបុគ្គលិករុស្ស៊ីដែលបានចូលរួមក្នុងសមយុទ្ធនោះ ក៏មានទាហានដែលឈរជើងនៅប្រទេសតាជីគីស្ថាន និងកៀហ្ស៊ីស៊ីស្ថានដែលជាប្រទេសជិតខាងរបស់អាហ្វហ្គានីស្ថានដែរ។
ទន្ទឹមគ្នានេះ,ក្រុមអ្នកសង្កេតការណ៍ក៏បានសម្ដែងការគាំទ្រផ្នែកយោធារបស់រុស្ស៊ីចំពោះប្រទេសទាំងនេះដែលបានបង្ហាញនៅក្នុងសមយុទ្ធខាងដើមគឺជាការអះអាងពីឥទ្ធិពលរបស់ខ្លួនក្នុងតំបន់បន្ទាប់ពីការដកកងទ័ពអាមេរិកចេញពីអាហ្វហ្គានីស្ថាន៕
