រុស្ស៊ីដាក់បំរាមកូវីដ-១៩ជាថ្មីនៅទីក្រុងមូស្គូ និងទីក្រុងសាំង-ពេថើប៊ឺគក្រោយចំនួនអ្នកឆ្លងថ្មីកើនឡើងខ្ពស់ម្ដងទៀត

ទីក្រុងធំៗចំនួន២របស់រុស្ស៊ីគឺទីក្រុងមូស្គូ និងសាំង-ពេថើប៊ឺគនឹងដាក់បំរាមលើសកម្មភាពសេដ្ឋកិច្ច ខណៈដែលករណីឆ្លងកូវីដ១៩កំពុងកើនឡើងខ្ពស់ម្តងទៀត។

ប្រទេសរុស្ស៊ីបានកត់ត្រាករណីថ្មីប្រចាំថ្ងៃលើសពី ៣ ម៉ឺននាក់ចាប់តាំងពីពាក់កណ្តាលខែតុលានិងឈានដល់កម្រិតខ្ពស់ប្រមាណ៣៧,០០០នាក់កាលពីថ្ងៃសៅរ៍។

លោកវ្ល៉ាឌីមៀរ ពូទីន ប្រធានាធិបតីរុស្ស៊ី​បានចុះហត្ថលេខាលើបទបញ្ជាប្រតិបត្តិមួយដើម្បីកំណត់បំរាមរយៈពេល ៩ ថ្ងៃពោលគឺចាប់ពីថ្ងៃទី ៣០ ខែតុលានិងជំរុញឱ្យក្រុងនានានៅទូទាំងប្រទេសរុស្ស៊ីអនុវត្តន៍តាមការណែនាំរបស់រដ្ឋាភិបាល។

ទីក្រុងម៉ូស្គូដែលមានចំនួនអ្នកឆ្លងខ្ពស់បំផុតនៅក្នុងប្រទេសនេះនឹងប្រកាសបំរាមពីរថ្ងៃមុនគឺចាប់ពីថ្ងៃទី ២៨ ខែតុលាដល់ថ្ងៃទី ៧ ខែវិច្ឆិកា។

នៅក្រោមបំរាមថ្មីនេះ, មានតែហាងលក់ដូរចំណីអាហារ និងសម្ភារៈប្រើប្រាស់ប្រចាំថ្ងៃតែប៉ុណ្ណោះដែលត្រូវបានអនុញ្ញាតឱ្យបើកទ្វា។ សាលារៀនក៏នឹងត្រូវបិទម្ដងទៀតផងដែរខណៈដែលរោងភាពយន្តនិងសារមន្ទីរនឹងទទួលយកតែអ្នកដែលបានចាក់វ៉ាក់សាំងហើយត្រូវកំណត់ចំនួនអ្នកចូលទស្សនា។

នេះជាលើកដំបូងហើយចាប់តាំងពីខែមិថុនាឆ្នាំ២០២០ដែលបំរាមដូចគ្នានេះត្រូវបានដាក់នៅទីក្រុងម៉ូស្គូ។

ចំណែកទីក្រុងធំលំដាប់ទី២របស់រុស្ស៊ីគឺទីក្រុងសាំង-ពេថើប៊ឺគក៏បានប្រកាសពីការណែនាំនៃការរឹតបន្តឹងថ្មីនេះដែលចាប់ផ្តើមអនុវត្តន៍ពីថ្ងៃទី ៣០ ខែតុលា។

បច្ចុប្បន្នរដ្ឋាភិបាលរុស្ស៊ីកំពុងប្រឈមមុខនឹងវិបត្តិដែលកំពុងកើនឡើង។ មានតែពលរដ្ឋរុស្ស៊ីប្រមាណតែ ៣០ ភាគរយប៉ុណ្ណោះដែលបានចាក់វ៉ាក់សាំងពេញលេញ មូលហេតុនោះគឺដោយសារតែការមិនទុកចិត្តជាសាធារណៈចំពោះវ៉ាក់សាំងដែលផលិតក្នុងស្រុក៕

(Manith)