របាយការណ៍មួយបានឱ្យដឹងថា ជនប្រដាប់អាវុធបានចាប់ខ្លួនសមាជិករដ្ឋាភិបាលអន្តរកាលរបស់ស៊ូដង់ជាច្រើនរូបនៅក្នុងផ្ទះរបស់ពួកគេ ខណៈដែលវិបត្តិនយោបាយរបស់ប្រទេសកាន់តែធ្លាក់ជ្រៅទៅៗ។ សមាជិកគណៈរដ្ឋមន្ត្រីរបស់ស៊ូដង់យ៉ាងតិចណាស់ ៤ រូបត្រូវបានទាហានមិនស្គាល់អត្តសញ្ញាណឃាត់ខ្លួនភ្លាមៗមុនពេលថ្ងៃរះនាថ្ងៃចន្ទនេះ។
របាយការណ៍មួយបង្ហាញថា លោកនាយករដ្ឋមន្ត្រី Abdallah Hamdok ក៏ត្រូវបានចាប់ខ្លួនផងដែរ ប៉ុន្តែករណីនេះមិនត្រូវបានបញ្ជាក់ជាផ្លូវការនៅឡើយទេ។ មកទល់ពេលនេះ គេពុំទាន់ដឹងថានរណានៅពីក្រោយការបញ្ជាចាប់ខ្លួននេះទេ ហើយក្រុមយោធាក៏មិនបានធ្វើអត្ថាធិប្បាយលើរបាយការណ៍នេះដែរ។
សាក្សីបាននិយាយថា អ៊ីនធឺណិតលែងដំណើរការនៅរដ្ឋធានី Khartoum ខណៈវីដេអូនិងរូបភាពផ្សេងៗត្រូវបានបង្ហោះនៅលើប្រព័ន្ធផ្សព្វផ្សាយសង្គម ដែលបង្ហាញពីហ្វូងមនុស្សកំពុងផ្ទុះកំហឹងនិងដុតសំបកកង់ឡាននៅតាមដងផ្លូវ។
ក្រុមគាំទ្រលទ្ធិប្រជាធិបតេយ្យសំខាន់ៗរបស់ស៊ូដង់បានអំពាវនាវឱ្យអ្នកគាំទ្ររបស់ខ្លួនទប់ទល់នឹង “រដ្ឋប្រហារយោធា” ណាមួយ។
សូមជម្រាបជូនផងដែរថា ការរាយការណ៍ពីការចាប់ខ្លួនមន្ត្រីជាន់ខ្ពស់បានលេចឡើង ចំពេលមានភាពតានតឹងរវាងយោធានិងអាជ្ញាធរអន្តរកាលស៊ីវិល។ ភាគីទាំងពីរបានបែងចែកអំណាច ចាប់តាំងពីការផ្តួលរំលំលោកប្រធានាធិបតី Omar al-Bashir ក្នុងឆ្នាំ២០១៩។
កាលពីដើមខែនេះ ក្រុមអ្នកប្រឆាំងរបស់ប្រទេសស៊ូដង់បានដើរតាមផ្លូវនៃរដ្ឋធានី Khartoum ដើម្បីអំពាវនាវឱ្យកងទ័ពគ្រប់គ្រងប្រទេស។ ហើយកាលពីថ្ងៃព្រហស្បតិ៍សប្ដាហ៍មុន មនុស្សរាប់ម៉ឺននាក់បានធ្វើបាតុកម្មនៅទីក្រុង Khartoum ដើម្បីបង្ហាញពីសាមគ្គីភាពជាមួយរដ្ឋាភិបាលអន្តរកាល។ ប៉ុន្ដែការគាំទ្រលើរដ្ឋាភិបាលបណ្តោះអាសន្នបានធ្លាក់ចុះក្នុងរយៈពេលប៉ុន្មានខែថ្មីៗនេះ ដោយសារតែសេដ្ឋកិច្ចរបស់ប្រទេសមានការដាំក្បាលចុះ៕
