អន្តរជាតិ៖លោក Carlos Del Toro លេខាធិការនៃកងទ័ពជើងទឹកអាមេរិកបានសម្តែងការព្រួយបារម្ភកាលពីថ្ងៃចន្ទអំពីនាវាចម្បាំងចិន និងរុស្ស៊ីដែលធ្វើនាវាចរណ៍នៅលើដែនសមុទ្រជប៉ុន។មន្រ្តីអាមេរិករូបនេះបានចោទថាសកម្មភាពរបស់ពួកគេគឺមិនផ្អែកលើវិធានច្បាប់និងបង្កការគំរាមកំហែង។
នៅថ្ងៃទី១៨ ខែតុលានាវាយោធាចិននិងរុស្ស៊ីចំនួន ១០គ្រឿនបានឆ្លងកាត់ច្រកសមុទ្រ ត្សូហ្គារ៉ូដែលស្ថិតនៅចន្លោះកោះសំខាន់ចំនួនពីររបស់ប្រទេសជប៉ុនគឺកោះ Honshu និង Hokkaido ។ បន្ទាប់មក នៅថ្ងៃសុក្រ ពួកគេបានឆ្លងកាត់ច្រកសមុទ្រ Osumi ចេញពីឆ្នេរសមុទ្រភាគនិរតីរបស់ប្រទេសជប៉ុន។
បណ្តាញទាំងពីរនេះគឺជាផ្លូវទឹកអន្តរជាតិ។ កប៉ាល់បរទេស រួមទាំងនាវាចម្បាំងផងដែរ ត្រូវបានអនុញ្ញាតឱ្យធ្វើនាវាចរឆ្លងកាត់ច្រកទាំងនេះ។
ក្រុមមន្ត្រីមកពីក្រសួងការពារជាតិរបស់ប្រទេសជប៉ុន បាននិយាយថា នេះជាលើកទីមួយហើយ ដែលពួកគេបានឃើញនាវាចម្បាំងចិន និងរុស្ស៊ី បើកឆ្លងកាត់ច្រកសមុទ្រក្នុងពេលតែមួយ។
លោក Del Toro បាននិយាយថា ការរារាំងនឹងជួយជម្រុញឲ្យចិន និងរុស្ស៊ីគោរពសណ្តាប់ធ្នាប់អន្តរជាតិ។ លោកពោលថា នោះជាគន្លឹះមួយសម្រាប់ស្ថិរភាពក្នុងតំបន់។ លោកបានសន្យាផ្ដល់កិច្ចសហប្រតិបត្តិការបន្ថែមទៀតជាមួយប្រទេសជប៉ុន និងប្រជាជាតិដទៃទៀតនៅក្នុងតំបន់៕
