អន្តរជាតិ៖សហរដ្ឋអាមេរិកកាលពីថ្ងៃចន្ទបានសម្រេចផ្អាកជំនួយសេដ្ឋកិច្ចចំនួន ៧០០លានដុល្លារអាមេរិកដល់ប្រទេសស៊ូដង់ បន្ទាប់ពីកងកម្លាំងយោធារបស់ប្រទេសនេះបានចាប់ខ្លួនមេដឹកនាំនិងមន្ត្រីក្នុងជួររដ្ឋាភិបាលស៊ីវិល។
លោក Ned Price អ្នកនាំពាក្យក្រសួងការបរទេសបាននិយាយក្នុងអំឡុងសន្និសីទសារព័ត៌មានមួយថា”សហរដ្ឋអាមេរិកថ្កោលទោសចំពោះសកម្មភាពដែលបានធ្វើឡើងពេញមួយយប់ដោយកងកម្លាំងយោធាស៊ូដង់”។ហើយ “ការចាប់ខ្លួនមន្ត្រីរដ្ឋាភិបាលស៊ីវិល និងមេដឹកនាំនយោបាយផ្សេងទៀត រួមទាំងលោកនាយករដ្ឋមន្ត្រី Abdalla Hamdok បានធ្វើឱ្យខូចខាតដល់ការគ្រប់គ្រងប្រទេសតាមបែបប្រជាធិបតេយ្យ”។
លោកបានបន្ថែមថា “ដោយមើលឃើញពីការវិវត្តន៍ទាំងនេះ សហរដ្ឋអាមេរិកកំពុងផ្អាកជំនួយជាទឹកប្រាក់ ៧០០ លានដុល្លារក្នុងការផ្តល់ជំនួយសង្គ្រោះបន្ទាន់នៃមូលនិធិគាំទ្រសេដ្ឋកិច្ចសម្រាប់ស៊ូដង់”។
អ្នកនាំពាក្យរូបនេះ បានជំរុញឱ្យយោធាដោះលែងអ្នកនយោបាយដែលជាប់ឃុំទាំងអស់ជាបន្ទាន់ ស្ដាររដ្ឋាភិបាលអន្តរកាលដែលដឹកនាំដោយស៊ីវិលឡើងវិញ និងជៀសវាងពីអំពើហិង្សាទៅលើក្រុមបាតុករ។
សូមជ្រាបថាកាលពីព្រឹកថ្ងៃចន្ទ លោក Abdel Fattah Al-Burhan ប្រធានក្រុមប្រឹក្សាអធិបតេយ្យភាពស៊ូដង់បានប្រកាសដាក់ប្រទេសក្នុងភាពអាសន្ន ហើយបានរំលាយក្រុមប្រឹក្សាអធិបតេយ្យភាពអន្តរកាលនិងរដ្ឋាភិបាលបច្ចុប្បន្ន។
ការសម្រេចចិត្តនេះត្រូវបានធ្វើឡើងប៉ុន្មានម៉ោងបន្ទាប់ពីលោក Abdalla Hamdok នាយករដ្ឋមន្ត្រីស៊ូដង់ សមាជិកក្រុមប្រឹក្សាអធិបតេយ្យភាពអន្តរកាល និងរដ្ឋមន្ត្រីមួយចំនួនត្រូវបានចាប់ខ្លួនដោយកងកម្លាំងយោធាចម្រុះស៊ូដង់៕
