អន្តរជាតិ៖លោក Joseph Wu រដ្ឋមន្ត្រីការបរទេសតៃវ៉ាន់បានបង្ហាញគោលបំណងជំរុញកិច្ចសហប្រតិបត្តិការជាមួយបណ្តាប្រទេសនៅអឺរ៉ុប ខណៈលោកកំពុងធ្វើទស្សនកិច្ចនៅក្នុងប្រទេសស្លូវ៉ាគីនិងសាធារណរដ្ឋឆេក។
លោក Wu បានថ្លែងថា ប្រទេសមួយចំនួននៅអឺរ៉ុបដែលមិនមានទំនាក់ទំនងការទូតជាមួយទីក្រុងតៃប៉ិ នឹងមានក្តីសង្ឃឹមខ្ពស់ចំពោះតៃវ៉ាន់ក្នុងការរួមចំណែកផ្នែកសេដ្ឋកិច្ច និងការរួមចំណែកផ្សេងទៀត ហើយបានកត់សម្គាល់ថាប្រទេសមួយចំនួនកំពុងខិតខំប្រឹងប្រែងយ៉ាងខ្លាំងក្នុងការធ្វើឱ្យទំនាក់ទំនងកាន់តែស៊ីជម្រៅជាមួយកោះតៃវ៉ាន់។
លោករដ្ឋមន្ត្រីបានលើកឡើងពីឆន្ទៈរបស់ប្រទេសស្លូវ៉ាគីក្នុងការស្វាគមន៍រូបលោកនៅ ពេលរូបលោកថ្លែងសុន្ទរកថាទៅកាន់វេទិកាមួយដែលប្រារព្ធឡើងនៅក្នុងប្រទេសថាវាគឺជា “ជំហានឆ្ពោះទៅមុខដ៏អស្ចារ្យ” ។
លោកបានបន្តថា លោកមានភាពជឿជាក់ថានឹងមានប្រទេសអឺរ៉ុបកាន់តែច្រើនឡើងថែមទៀតដែលមានឆន្ទៈធ្វើដូចគ្នានេះ។
ជុំវិញការរិះគន់ពីប្រទេសចិនអំពីដំណើរទស្សនកិច្ចរបស់លោកទៅកាន់អឺរ៉ុបនេះ, លោក Wu បានពោលថាកោះតៃវ៉ាន់នឹងមិនបញ្ឈប់ការដើរទៅមុខរបស់ខ្លួន ដោយសារតែមន្ត្រីចិនខឹងសម្បារនោះឡើយ។
លោកបានសង្កត់ធ្ងន់ថា ជំនួសមកវិញ “តៃវ៉ាន់ចាំបាច់ត្រូវពិនិត្យមើលសក្តានុពលសម្រាប់ខ្លួនឯងក្នុងការធ្វើការជាមួយប្រទេសផ្សេងទៀត”។
ក្នុងពេលដំណាលគ្នានេះ,គណៈប្រតិភូតំណាងធុរកិច្ច ដឹកនាំដោយរដ្ឋមន្ត្រីពីររូប មកពីកោះតៃវ៉ាន់ ក៏កំពុងបំពេញទស្សនកិច្ចនៅប្រទេសស្លូវ៉ាគី សាធារណរដ្ឋឆេក និងលីទុយអានីផងដែរ៕
