អន្តរជាតិ៖លោក Hossein Amir Abdollahianរដ្ឋមន្ត្រីការបរទេសអ៊ីរ៉ង់ និង សមភាគីប៉ាគីស្ថាន,លោក Shah Mehmood Qureshi នៅថ្ងៃអង្គារសប្ដាហ៍នេះបានជួបពិភាក្សាគ្នាអំពីទំនាក់ទំនងទ្វេភាគី និងបញ្ហាក្នុងតំបន់ ជាពិសេសបញ្ហានៅអាហ្វហ្គានីស្ថាន។
កិច្ចប្រជុំខាងលើបានធ្វើឡើងនៅមុនកិច្ចប្រជុំថ្នាក់រដ្ឋមន្ត្រីការបរទេសមកពីប្រទេសជិតខាងអាហ្វហ្គានីស្ថាននាទីក្រុងតេហេរ៉ង់នៅថ្ងៃពុធសប្ដាហ៍នេះ។
នៅក្នុងសន្និសីទសារព័ត៌មានរួមគ្នាមួយបន្ទាប់ពីកិច្ចប្រជុំនោះ,លោក Amir Abdollahian បាននិយាយថា៖ “យើងជឿជាក់ថាការបង្កើតរដ្ឋាភិបាលចម្រុះមួយ ដោយមានការចូលរួមពីគ្រប់ក្រុមជនជាតិភាគតិចនៅក្នុងប្រទេសអាហ្វហ្គានីស្ថាន គឺជាយុទ្ធសាស្ត្រនយោបាយដ៏សំខាន់បំផុតសម្រាប់យើងទាំងអស់គ្នា”។
សម្រាប់សមភាគីប៉ាគីស្ថាន,លោក Qureshi បានថ្លែងថា “ប្រជាជនអាហ្វហ្គានីស្ថានសមនឹងទទួលបានសន្តិភាពនិងភាពស្ងប់ស្ងាត់”។
លោក Qureshi បានកត់សម្គាល់យ៉ាងដូច្នេះថា៖ “អស់រយៈពេល ៤ទសវត្សរ៍មកហើយ ពួកគេ (ប្រជាជនអាហ្វហ្គានីស្ថាន) បានរងទុក្ខ។ យើងជាប្រទេសជាប់របងនឹងអាហ្វហ្គានីស្ថាន, ដោយបានចាប់ដៃគ្នាផ្តល់សារយ៉ាងច្បាស់លាស់ដល់ជនជាតិអាហ្វហ្គានីស្ថានថា យើងជាអ្នកជិតខាង ឈរនៅក្បែរអ្នកក្នុងគ្រាដ៏លំបាកទាំងនេះ”។
លោក Qureshi ក៏បានសម្តែងការប្តេជ្ញាចិត្តក្នុងការពង្រឹងទំនាក់ទំនងទ្វេភាគីជាមួយអ៊ីរ៉ង់លើគ្រប់វិស័យ, ដោយបន្ថែមថាប៉ាគីស្ថានបានចាត់ទុកអ៊ីរ៉ង់ជាអ្នកជិតខាងដ៏ជិតស្និទ្ធ និងជាប្រទេសសំខាន់បំផុត។ នេះបើយោងតាមទីភ្នាក់ងារសារព័ត៌មាន IRNA ដោយដកស្រង់សេចក្តីថ្លែងការណ៍របស់ក្រសួងការបរទេសប៉ាគីស្ថាន។
ទន្ទឹមគ្នានេះ,លោកAmir Abdullahian ក៏បានរំលឹកឡើងវិញនូវការប្តេជ្ញាចិត្តពេញលេញរបស់អ៊ីរ៉ង់ក្នុងការពង្រឹងទំនាក់ទំនងទ្វេភាគីជាមួយប៉ាគីស្ថាននៅលើគ្រប់វិស័យ៕
