អន្តរជាតិ៖មេដឹកមកពីបណ្តាប្រទេសអាស៊ីអាគ្នេយ៍បានសម្តែងការព្រួយបារម្ភរបស់ពួកគេចំពោះជម្លោះកាន់តែស៊ីជម្រៅរវាងសហរដ្ឋអាមេរិក និងចិនជុំវិញសមុទ្រចិនខាងត្បូង និងបញ្ហាផ្សេងៗទៀត។
កិច្ចប្រជុំកំពូលអាស៊ីបូព៌ាបានធ្វើឡើងតាមប្រព័ន្ធអ៊ីធើណែតកាលពីថ្ងៃពុធដោយមានការចូលរួមពីសមាជិកនៃសមាគមប្រជាជាតិអាស៊ីអាគ្នេយ៍ ជប៉ុន សហរដ្ឋអាមេរិក ចិន និងប្រទេសដទៃទៀត។
បញ្ហានៅសមុទ្រចិនខាងត្បូងក្លាយជាប្រធានបទដ៏សំខាន់មួយ ខណៈក្រុងប៉េកាំងបាននិងកំពុងបង្កើនសកម្មភាពយោធានៅទីនោះដោយ រួមបញ្ចូលទាំងការកសាងកោះសិប្បនិម្មិត និងមូលដ្ឋានយោធា។
នៅក្នុងសកម្មភាពជាក់ស្តែងមួយ ដើម្បីទប់ទល់នឹងឥទ្ធិពលចិននៅក្នុងតំបន់ឥណ្ឌូប៉ាស៊ីហ្វិក, សហរដ្ឋអាមេរិកបានបង្កើតក្របខ័ណ្ឌសន្តិសុខដែលគេស្គាល់ថាជាកតិកាសញ្ញាសន្តិសុខAUKUS ជាមួយអូស្ត្រាលី និងអង់គ្លេស។
នៅក្នុងកិច្ចប្រជុំនេះ, ប្រធានាធិបតីអាមេរិកលោក Joe Biden បានសម្តែងការព្រួយបារម្ភចំពោះការគំរាមកំហែងចំពោះសណ្តាប់ធ្នាប់ដែលផ្អែកលើច្បាប់អន្តរជាតិជាក់ស្តែងដោយប្រទេសប្រទេសចិន ។ លោក Biden បានប្តេជ្ញាឈរជាមួយសម្ព័ន្ធមិត្ត និងដៃគូនានាក្នុងការគាំទ្រលទ្ធិប្រជាធិបតេយ្យ សិទ្ធិមនុស្ស នីតិរដ្ឋ និងសេរីភាពនៃដែនសមុទ្រ។
យ៉ាងណាមិញ,លោក Ismail Sabri Yaakob នាយករដ្ឋមន្ត្រីម៉ាឡេស៊ី បានសម្តែងការព្រួយបារម្មណ៍ថា កតិកាសញ្ញាសន្តិសុខដូចជា AUKUS អាចនាំឱ្យមានការប្រណាំងប្រជែងអាវុធ និងបង្កភាពតានតឹង ដែលអាចនាំឱ្យមានអស្ថិរភាពនៅសមុទ្រចិនខាងត្បូង៕
