អន្តរជាតិ៖មន្រ្តីជាន់ខ្ពស់របស់ក្រុមតាលីបង់បានជួបជាមួយប្រេសិតមកពីប្រទេសជាច្រើននៅថ្ងៃពុធសប្ដាហ៍នេះ។
លោក Amir Khan Muttaqi រដ្ឋមន្ត្រីការបរទេសស្តីទីនៃរដ្ឋាភិបាលបណ្តោះអាសន្នតាលីបង់បានជួបពិភាក្សាគ្នាជាមួយនឹងឯកអគ្គរដ្ឋទូតនិងអ្នកតំណាងពិសេសមកពី ១៤ ប្រទេស រួមទាំងប្រទេសជប៉ុន អាល្លឺម៉ង់ និងហូឡង់នៅរដ្ឋធានី Doha របស់ប្រទេសកាតា។
អ្នកនាំពាក្យតាលីបង់និយាយថា លោក Muttaqi បានស្នើឱ្យប្រទេសនានាទទួលស្គាល់រដ្ឋាភិបាលតាលីបង់។
លោកក៏បានស្វែងរកកិច្ចសហប្រតិបត្តិការពីបណ្ដារប្រទេសទាំងនោះផងដែរ ដើម្បីឲ្យសហរដ្ឋអាមេរិក និងប្រទេសផ្សេងទៀតដោះលែងទ្រព្យសម្បត្តិរបស់រដ្ឋាភិបាលអាហ្វហ្គានីស្ថាននៅក្រៅប្រទេស។
សូមជ្រាបថាកិច្ចប្រជុំនេះធ្វើឡើងបន្ទាប់ពីទីភ្នាក់ងារស្បៀងអាហាររបស់អង្គការសហប្រជាជាតិកាលពីថ្ងៃចន្ទបានព្រមានថាជាងពាក់កណ្តាលនៃចំនួនប្រជាជនអាហ្វហ្គានីស្ថានអាចប្រឈមនឹងភាពអត់ឃ្លានធ្ងន់ធ្ងរ។
ក្រុមតាលីបង់ ហាក់ដូចជាកំពុងបង្កើនកិច្ចខិតខំប្រឹងប្រែង ក្នុងការកសាងទំនាក់ទំនងជាមួយបរទេស ដើម្បីរារាំងសេដ្ឋកិច្ចរបស់ប្រទេសអាហ្វហ្គានីស្ថានពីការធ្លាក់ដុនដាបបន្ថែមទៀត៕
