អន្តរជាតិ៖អ្នកការទូតកំពូលអ៊ីរ៉ង់បាននិយាយកាលពីថ្ងៃពុធថា ពួកគេត្រៀមខ្លួនរួចរាល់ដើម្បីចាប់ផ្តើមកិច្ចចរចាស្តីពីការស្រោចស្រង់កិច្ចព្រមព្រៀងនុយក្លេអ៊ែរឱ្យរស់ឡើងវិញ។ ប៉ុន្តែអ៊ីរ៉ង់ចង់ឱ្យប្រធានាធិបតីសហរដ្ឋអាមេរិក Joe Biden មានឥរិយាបថស្មោះត្រង់។
លោក Hossein Amir-Abdollahian រដ្ឋមន្ត្រីការបរទេសអ៊ីរ៉ង់បាននិយាយថា មេដឹកនាំនៅទីក្រុង Tehran ចង់ឱ្យលោក Biden ដោះលែងទ្រព្យសម្បត្តិចំនួន ១០ ពាន់លានដុល្លារ។ ទណ្ឌកម្មរបស់អាមេរិកបានបង្កកមូលនិធិអ៊ីរ៉ង់ ដែលភាគច្រើនបានមកពីការនាំចេញប្រេង និងឧស្ម័ននៅក្នុងធនាគារបរទេស។
លោក Ali Bagheri អនុរដ្ឋមន្ត្រីការបរទេសអ៊ីរ៉ង់ បានជួបជាមួយបេសកជនមកពីសហភាពអឺរ៉ុបលោក Enrique Moraនៅទីក្រុងប្រ៊ុចសែលកាលពីថ្ងៃពុធម្សិលមិញ។ លោក Ali Bagheri បាននិយាយថា អ៊ីរ៉ង់បានយល់ព្រមចាប់ផ្តើមការចរចានៅចុងខែវិច្ឆិកា។
អ្នកចរចាមកពីអ៊ីរ៉ង់និងអាមេរិកបានធ្វើដំណើរទៅកាន់ទីក្រុងវីយែនជាច្រើនលើកចាប់ពីខែមេសាដើម្បីជួបគ្នាតាមរយៈអន្តរការី។ យ៉ាងណាមិញ,ពួកគេមិនបានជួបចរចារគ្នាទេ ចាប់តាំងពីការបោះឆ្នោតក្នុងខែមិថុនា នៅពេលដែលប្រធានាធិបតីអ៊ីរ៉ង់ Ebrahim Raisi ឡើងកាន់អំណាច។
សូមរំលឹកថាមហាអំណាចពិភពលោកបានឈានដល់កិច្ចព្រមព្រៀងនុយក្លេអ៊ែរអ៊ីរ៉ង់នៅក្នុងឆ្នាំ២០១៥ ។តែបីឆ្នាំក្រោយមក,អតីតប្រធានាធិបតីលោក Donald Trump បានដកសហរដ្ឋអាមេរិកចេញពីកិច្ចព្រមព្រៀងនេះ និងដាក់ទណ្ឌកម្មទាំងអស់ឡើងវិញ។ប្រទេសអ៊ីរ៉ង់បានឆ្លើយតបដោយការបន្តកម្មវិធីនុយក្លេអ៊ែររបស់ពួកគេ៕
