ធនាគារពិភពលោក (World Bank) បាននិយាយកាលពីថ្ងៃពុធថា ការប្រែប្រួលអាកាសធាតុនឹងបង្ខំឱ្យប្រជាជនអាហ្វ្រិកខាងកើតរាប់សិបលាននាក់បោះបង់ចោលផ្ទះរបស់ពួកគេក្នុងរយៈពេលបីទសវត្សរ៍ខាងមុខ បើទោះបីជាគម្រោងកាត់បន្ថយផលប៉ះពាល់ទៅលើតំបន់នេះត្រូវបានដាក់ឱ្យអនុវត្តក្ដី។
ធនាគារពិភពលោកបានបញ្ជាក់តាមរយៈរបាយការណ៍មួយ ដែលបានចេញផ្សាយ៤ថ្ងៃមុនពេលកិច្ចប្រជុំកំពូលអាកាសធាតុរបស់អង្គការសហប្រជាជាតិ COP26 ចាប់ផ្តើមនៅទីក្រុង Glasgow ថា ប្រជាជនដែលរងផលប៉ះពាល់នឹងរាប់បញ្ចូលទាំងកសិករដែលរងគ្រោះដោយគ្រោះរាំងស្ងួត កសិករដែលកំពុងស្វែងរកដីបង្កបង្កើនផលថ្មី ឬការងារផ្សេងៗគ្នានៅក្នុងទីក្រុង។
ប្រទេសចំនួនប្រាំនៅតំបន់អាហ្រ្វិកខាងកើតរួមមានកេនយ៉ា រវ៉ាន់ដា តង់ហ្សានី អ៊ូហ្គង់ដា និងប៊ូរុនឌី បានជួបវិបត្តិអាកាសធាតុកាន់តែធ្ងន់ធ្ងរឡើងៗក្នុងប៉ុន្មានឆ្នាំថ្មីៗនេះ។
ក្រៅពីគ្រោះរាំងស្ងួតកាន់តែអាក្រក់ក្នុងតំបន់ដែលពឹងផ្អែកខ្លាំងលើវិស័យកសិកម្ម តំបន់នេះក៏បានរងគ្រោះទឹកជំនន់នៅឆ្នាំ២០២០ និងរងការរាតត្បាតពីហ្វូងសត្វកណ្ដូបដែលបានបំផ្លិចបំផ្លាញដំណាំចាប់តាំងពីឆ្នាំ២០១៩រហូតមកទល់ពេលនេះ។
លោក Hafez Ghanem អនុប្រធានធនាគារពិភពលោកប្រចាំតំបន់បាននិយាយថា៖ “ប្រសិនបើគ្មានវិធានការបន្ទាន់និងទូលំទូលាយទេ… មនុស្សរហូតដល់ ៣៨.៥ លាននាក់អាចនឹងត្រូវផ្លាស់ទីលំនៅ ដោយសារតែផលវិបាកនៃការប្រែប្រួលអាកាសធាតុនៅឆ្នាំ២០៥០”។
លោក Ghanem បានបន្ដថា ធនាគារបានប្តេជ្ញាធានាថា ៣៥% នៃហិរញ្ញប្បទានរបស់ខ្លួនក្នុងរយៈពេល ៥ ឆ្នាំខាងមុខនឹងប្រើប្រាស់លើគម្រោងដែលនឹងជួយដោះស្រាយការគំរាមកំហែងនៃការប្រែប្រួលអាកាសធាតុ៕
