ឧត្តមសេនីយកំពូលរបស់សហរដ្ឋអាមេរិកលោក Mark Milley បានមានប្រសាសន៍ថា ការបាញ់សាកល្បងមីស៊ីលល្បឿនលឿនជាងសម្លេង (Hypersonic) របស់ចិនគឺជារឿងដ៏គួរឱ្យព្រួយបារម្ភ ហើយលោកបានប្រៀបប្រដូចព្រឹត្តិការណ៍នេះទៅនឹងការបាញ់បង្ហោះផ្កាយរណប Sputnik របស់សូវៀតក្នុងសម័យសង្គ្រាមត្រជាក់ ដែលបានជំរុញឱ្យមានការប្រកួតប្រជែងអាវុធ។
លោក Mark Milley បានថ្លែងដូចនេះក្នុងបទសម្ភាសន៍ជាមួយកាសែត Bloomberg News ហើយលោកបានសង្កត់ធ្ងន់ថា យោធាចិនកំពុងពង្រីកសមត្ថភាពយ៉ាងឆាប់រហ័ស។ ទន្ទឹមនេះ កាសែត Financial Times បានរាយការណ៍នៅខែនេះថា ការបាញ់សាកល្បងនេះបានធ្វើឱ្យយោធាសហរដ្ឋអាមេរិកមានការភ្ញាក់ផ្អើល។
ដោយឡែក ទីក្រុងប៉េកាំងបានបដិសេធរាល់ការបាញ់សាកល្បងគ្រាប់មីស៊ីល ដោយបាននិយាយថា វាជាយានអវកាស។
លោក Milley បានប្រាប់កាសែត Bloomberg កាលពីថ្ងៃពុធថា៖ “អ្វីដែលយើងបានឃើញគឺជាព្រឹត្តិការណ៍ដ៏សំខាន់មួយនៃការសាកល្បងប្រព័ន្ធអាវុធលឿនជាងសំឡេង។ វាគួរឱ្យព្រួយបារម្ភខ្លាំងណាស់។ ខ្ញុំគិតថា វាស្ទើតែដូចព្រឹត្តិការណ៍ Sputnik ហើយយើងបានផ្ដោតការយកចិត្តទុកដាក់លើការបាញ់បង្ហោះនេះ”។
គួរបញ្ជាក់ផងដែរថា ការអត្ថាធិប្បាយរបស់មេទ័ពកំពូលរូបនេះគឺជាការទទួលស្គាល់ជាផ្លូវការលើកដំបូងដោយសហរដ្ឋអាមេរិកចំពោះការអះអាងថា ចិនបានធ្វើតេស្តមីស៊ីលចំនួនពីរលើកកាលពីរដូវក្តៅ។ របាយការណ៍បង្ហាញថា វាគឺជាមីស៊ីលដែលមានសមត្ថភាពដូចនុយក្លេអ៊ែរ ដែលអាចគេចពីប្រព័ន្ធការពារដែនអាកាសរបស់សហរដ្ឋអាមេរិកបាន៕
