អន្តរជាតិ៖លោក Martin Griffiths អគ្គលេខាធិការរងអង្គការសហប្រជាជាតិទទួលបន្ទុកកិច្ចការមនុស្សធម៌បាននិយាយកាលពីថ្ងៃពុធថា ប្រជាជនស៊ីរីត្រូវការជំនួយបន្ថែមទៀត នៅពេលដែលរដូវរងាខិតជិតមកដល់។
លោកបានប្រាប់ក្រុមប្រឹក្សាសន្តិសុខនៅក្នុងសន្និសីទសង្ខេបមួយថា ជីវិតប្រចាំថ្ងៃនៅក្នុងប្រទេសស៊ីរីកាន់តែមានលទ្ធភាពតិចទៅៗ។ប្រជាជនជាង ៩០ ភាគរយកំពុងរស់នៅក្រោមបន្ទាត់នៃភាពក្រីក្រ ហើយមនុស្សជាច្រើនត្រូវបានបង្ខំឱ្យធ្វើការជ្រើសរើសដ៏លំបាកបំផុតដើម្បីរកដំណោះស្រាយ។
ថែមពីលើនៃការកើនឡើងភាពក្រីក្រ វិបត្តិទឹក និងសន្តិសុខស្បៀងកាន់តែអាក្រក់ ប្រជាជនស៊ីរីក៏កំពុងប្រឈមមុខនឹងការងើបឡើងវិញនៃ COVID-19 ផងដែរ។ លោក Griffiths បាននិយាយថា ករណីកូវីដ-១៩កំពុងកើនឡើង អង្គភាពថែទាំដែលពឹងផ្អែកខ្លាំងគឺផ្ទុកអ្នកឆ្លងហួសសមត្ថភាព ខណៈអត្រានៃអ្នកចាក់វ៉ាក់សាំងនៅតែទាបជាងពីរភាគរយដដែល។
លោកបានព្រមានថា៖ “ដោយសារជម្លោះ ភាពក្រីក្រ និងជំងឺរាតត្បាតជាច្រើនឆ្នាំកន្លងមក,ឥឡូវនេះ ប្រជាជនស៊ីរីហៀបនឹងប្រឈមមុខនឹងរដូវរងាដ៏ជូរចត់មួយទៀត។ នៅពេលដែលសីតុណ្ហភាពចាប់ផ្តើមធ្លាក់ចុះ ទឹកភ្លៀង អាកាសធាតុត្រជាក់ និងរដូវរងានឹងធ្វើឱ្យមានការលំបាកសម្រាប់មនុស្សរាប់លាននាក់”។
លោកបាននិយាយថាទោះបីជាអង្គការសហប្រជាជាតិនិងដៃគូមនុស្សធម៌របស់ខ្លួនកំពុងធ្វើគ្រប់យ៉ាងដែលអាចធ្វើទៅបានដើម្បីជួយអ្នកងាយរងគ្រោះបំផុតក៏ដោយ ក៏គម្លាតផ្នែកថវិកាដ៏សំខាន់នៅតែមាន។
“យើងត្រូវការជំនួយសង្គ្រោះជីវិតបន្ទាន់ ជាពិសេសនៅពេលដែលប្រជាជនស៊ីរីត្រៀមខ្លួនសម្រាប់រដូវរងា។ យើងត្រូវការជំនួយបន្ថែមទៀតសម្រាប់ការសង្គ្រោះទាន់ពេលវេលា និងជីវភាពរស់នៅប្រចាំថ្ងៃ។ ហើយយើងត្រូវពង្រីកលទ្ធភាពទទួលបានសេវាសង្គមជាមូលដ្ឋានជាចាំបាច់”៕
