អតីតមេដឹកនាំពិភពលោកនិងឥស្សរជនពិភពលោកជាង ១៦០ រូប តាមរយៈលិខិតមួយ បានអំពាវនាវឱ្យចក្រភពអង់គ្លេសនិងប្រទេសអ្នកមានផ្សេងទៀតបញ្ជូនវ៉ាក់សាំង ដែលលើសនិងស្ដុកទុកចោលក្នុងឃ្លាំងចំនួនរាប់លានដូស ទៅកាន់ប្រទេសអភិវឌ្ឍន៍តិចតួចជាបន្ទាន់។
ក្រុមអតីតមេដឹកនាំពិភពលោកនិងឥស្សរជនបានបញ្ជាក់ថា ការខ្ជះខ្ជាយវ៉ាក់សាំងគឺជារឿងអសីលធម៌ ខណៈពេលដែលមនុស្សរាប់ពាន់នាក់កំពុងស្លាប់ដោយសារមេរោគជារៀងរាល់ថ្ងៃ។
ការអំពាវនាវ ដែលបានធ្វើឡើងតាមរយៈលិខិតនេះ ត្រូវបានរៀបចំដោយអតីតនាយករដ្ឋមន្ត្រីចក្រភពអង់គ្លេសលោក Gordon Brown។ លិខិតនេះត្រូវបានផ្ញើជូនលោកនាយករដ្ឋមន្រ្តីអ៊ីតាលី Mario Draghi ដែលកំពុងធ្វើជាម្ចាស់ផ្ទះរបស់កិច្ចប្រជុំក្រុមប្រទេស G20 នៅទីក្រុងរ៉ូម នៅចុងសប្តាហ៍នេះ។
ប្រទេសហត្ថលេខីនៃលិខិតនោះរួមមានអតីតប្រធានាធិបតីចំនួន ៣៦ រូប អតីតនាយករដ្ឋមន្ត្រីចំនួន ៣០ រូប និងឥស្សរជនពិភពលោកដ៏មានឥទ្ធិពលចំនួន ១០០ រូបផ្សេងទៀត។
ខណៈពេលដែលវ៉ាក់សាំងបង្ការជំងឺកូវីដ-១៩ចំនួន៦ពាន់លានដូសត្រូវបានចាក់នៅទូទាំងពិភពលោក មានតែបណ្ដាប្រទេសមួយចំនួនប៉ុណ្ណោះដែលមានអត្រាចាកវ៉ាក់សាំង ៧០% ប៉ុន្ដែចំពោះប្រទេសដែលមានប្រាក់ចំណូលទាបវិញ មានអត្រាចាក់វ៉ាក់សាំងតែ ២%ប៉ុណ្ណោះ។
លិខិតនោះបានសង្កត់ធ្ងន់ថា ក្នុងចំណោមបណ្ដាប្រទេសនានាដូចជា សហរដ្ឋអាមេរិក សមាជិកសហភាពអឺរ៉ុប ចក្រភពអង់គ្លេស និងកាណាដានឹងមានវ៉ាក់សាំងដែលមិនទាន់បានប្រើចំនួន ២៤០ លាននៅដំណាច់ខែនេះ ដែលអាចដឹកជញ្ជូនភ្លាមៗទៅកាន់ប្រទេសដែលត្រូវការជំនួយបំផុត។
ប្រសិនបើសំណើទទួលបានការឯកភាព គោលដៅរបស់អង្គការសុខភាពពិភពលោកក្នុងការចាក់វ៉ាក់សាំងលើមនុស្សពេញវ័យទាំងអស់ឱ្យបាន៧០%នៅនិទាឃរដូវឆ្នាំក្រោយ នឹងអាចសម្រេចបាន៕
