ប្រធានាធិបតីបារាំងលោក អេម៉ានុយអែល ម៉ាក្រុង និងនាយករដ្ឋមន្ត្រីអូស្ត្រាលីលោក ស្កុត មូរីសុន បានជួបពិភាក្សាគ្នាទល់មុខជាលើកដំបូង ចាប់តាំងពីប្រទេសអូស្ដ្រាលីបានរំសាយចោលកិច្ចព្រមព្រៀងផលិតនាវាមុជទឹកជាមួយបារាំង និងបានងាកមករកភាពជាដៃគូជាមួយសហរដ្ឋអាមេរិកនិងចក្រភពអង់គ្លេសវិញ។
ការិយាល័យរបស់លោក ម៉ាក្រុង បានឱ្យដឹងថា លោកប្រធានាធិបតីបានប្រាប់លោកនាយករដ្ឋមន្ត្រីតាមទូរស័ព្ទថា ហេតុការណ៍កាលពីខែមុនបានធ្វើឱ្យខូចខាតដល់ការជឿទុកចិត្តរវាងប្រទេសទាំងពីរ។ ចំណែកឯការិយាល័យរបស់លោកនាយករដ្ឋមន្ត្រីអូស្ដ្រាលីបាននិយាយថា មេដឹកនាំទាំងពីរមានការពិភាក្សាដ៏ស្មោះត្រង់។
គួររំលឹកផងដែរថា ទីក្រុងប៉ារីសមានការខឹងសម្បារយ៉ាងខ្លាំង បន្ទាប់ពីប្រទេសអូស្ត្រាលីបានលុបចោលកិច្ចព្រមព្រៀងផលិតនាវាមុជទឹកចំនួន ១២ គ្រឿងក្នុងតម្លៃរាប់ពាន់លានដុល្លារ ហើយអូស្ដ្រាលីបានងាកមកបង្កើតកតិកាសញ្ញាការពារជាតិថ្មីមួយដែលហៅកាត់ថា AUKUS ជាមួយប្រទេសមហាអំណាចពីរផ្សេងទៀតគឺ សហរដ្ឋអាមេរិក និងចក្រភពអង់គ្លេស។
បារាំងបានកោះហៅឯកអគ្គរដ្ឋទូតរបស់ខ្លួនប្រចាំនៅអូស្ត្រាលីនិងសហរដ្ឋអាមេរិកចូលប្រទេសវិញ ហើយរដ្ឋមន្ត្រីការបរទេសបារាំងលោក ហ្សង់ អ៊ីវ ឡឺ ឌ្រីយ៉ង់ បានថ្កោលទោសការសម្រេចចិត្តរបស់អូស្ត្រាលី និងបានហៅសកម្មភាពនេះថាជាការចាក់ពីក្រោយខ្នង។
ការចាប់ដៃគូររវាងអូស្ដ្រាលី សហរដ្ឋអាមេរិក និងចក្រភពអង់គ្លេសត្រូវបានគេមើលឃើញយ៉ាងទូលំទូលាយថាជាកិច្ចខិតខំប្រឹងប្រែងដើម្បីទប់ទល់នឹងការកើនឡើងនៃឥទ្ធិពលយោធារបស់ចិន នឹងអនុញ្ញាតឱ្យអូស្ត្រាលីបង្កើតនាវាមុជទឹកដើរដោយថាមពលនុយក្លេអ៊ែរជាលើកដំបូង ដោយប្រើបច្ចេកវិទ្យាដែលផ្តល់ដោយសហរដ្ឋអាមេរិក។
ចិនបានថ្កោលទោសការចាប់ដៃគ្នារវាងប្រទេសទាំងបីនេះ និងបានហៅថាជាការគ្មានការទំនួលខុសត្រូវយ៉ាងខ្លាំងបំផុត៕
