ព្រះអង្គ Abdullah ព្រះមហាក្សត្ររបស់ប្រទេសហ្ស៊កដានី ក្នុងអំឡុងដំណើររបស់ទ្រង់ទៅកាន់ចក្រភពអង់គ្លេសនិងបានយាងសំណេះសំណាលជាមួយលោក Boris Johnson នាយករដ្ឋមន្ត្រីចក្រភពអង់គ្លេស កាលពីថ្ងៃព្រហស្បតិ៍ បានលើកឡើងពីសារៈសំខាន់នៃកិច្ចខិតខំប្រឹងប្រែងអន្តរជាតិ ដើម្បីជួយស្ដារស្ថិរភាពនៅតំបន់មជ្ឈិមបូព៌ា ។
ក្នុងជំនួបនេះ លោក Boris Johnson បានអបអរសាទរប្រជាជនហ្ស៊កដានីក្នុងខួបមួយសតវត្សរបស់ពួកគេ ហើយបានរំលឹកឡើងវិញនូវទំនាក់ទំនងមិត្តភាពដ៏ជិតស្និទ្ធ និងយូរអង្វែងរបស់ចក្រភពអង់គ្លេសជាមួយប្រទេសនេះ។
នៅមុនកិច្ចប្រជុំកំពូលអាកាសធាតុ COP26 នៅសប្តាហ៍ក្រោយ លោកនាយករដ្ឋមន្ត្រីបានស្វាគមន៍ផែនការរបស់ហ្ស៊កដានី ក្នុងការបង្កើនគោលដៅកាត់បន្ថយការបំភាយឧស្ម័នទ្វេដង។
មេដឹកនាំបានពិភាក្សាអំពីសារៈសំខាន់នៃការងាកទៅប្រើប្រាស់ថាមពលកកើតឡើងវិញ ក៏ដូចជាធានាថាហ្ស៊កដានី និងតំបន់មជ្ឈិមបូព៌ាអាចប្រើប្រាស់ហេដ្ឋារចនាសម្ព័ន្ធ និងធនធាន ប្រកបដោយគុណភាពនិងនិរន្តរភាព។
លោកនាយករដ្ឋមន្ត្រីក៏បានលើកឡើងពីតួនាទីសំខាន់របស់ហ្ស៊កដានីក្នុងការធានាស្ថិរភាពក្នុងតំបន់។ ថ្នាក់ដឹកនាំបានឯកភាពបន្តសហការយ៉ាងជិតស្និទ្ធលើវិស័យការពារជាតិ និងសន្តិសុខ ក៏ដូចជាការអភិវឌ្ឍបន្ថែមទៀតនូវទំនាក់ទំនងពាណិជ្ជកម្ម និងវិបុលភាព។
ព្រះមហាក្សត្ររបស់ប្រទេសហ្ស៊កដានីក៏បានជួបជាមួយរដ្ឋមន្ត្រីការបរទេសចក្រភពអង់គ្លេស Liz Truss ផងដែរ ហើយទ្រង់បានមានបន្ទូលពីតម្រូវការស្វែងរកដំណោះស្រាយផ្នែកនយោបាយនៅប្រទេសក្នុងតំបន់មជ្ឈិមបូព៌ា ដែលកំពុងជួបវិបត្តិ៕
