អន្តរជាតិ៖រដ្ឋមន្ត្រីក្រសួងការបរទេសចិនលោក Wang Yi បានថ្កោលទោសសហរដ្ឋអាមេរិកចំពោះការអំពាវនាវឱ្យសមាជិកនៃអង្គការសហប្រជាជាតិគាំទ្រដល់ការចូលរួមរបស់តៃវ៉ាន់នៅក្នុងសកម្មភាពរបស់ស្ថាប័នពិភពលោកមួយនេះ។
ក្រសួងការបរទេសចិនបាននិយាយថា លោក Wang បានចេញសេចក្តីអធិប្បាយមួយកាលពីថ្ងៃសុក្រ នៅក្នុងប្រទេសអ៊ីតាលី ជាកន្លែងដែលលោកនឹងចូលរួមកិច្ចប្រជុំកំពូលនៃក្រុមប្រទេសសេដ្ឋកិច្ចជឿនលឿនG 20 ។ សេចក្តីថ្លែងការណ៍របស់លោក គឺពាក់ព័ន្ធនឹងការអំពាវនាវរបស់រដ្ឋមន្ត្រីការបរទេសអាមេរិកលោក Antony Blinken កាលពីថ្ងៃអង្គារសម្រាប់សមាជិកអង្គការសហប្រជាជាតិឱ្យគាំទ្រកោះតៃវ៉ាន់។
លោក Wang បាននិយាយនៅក្នុងសេចក្តីថ្លែងការណ៍នោះថា តៃវ៉ាន់គឺជាផ្នែកមួយនៃទឹកដីរបស់ប្រទេសចិន ហើយនេះបានក្លាយជាការទទួលស្គាល់ជាទូទៅនៅក្នុងសហគមន៍អន្តរជាតិ។
លោកបានបន្តថាប្រទេសណាដែល«មានចេតនា»ធ្វើទុក្ខបុកម្នេញលើបញ្ហាតៃវ៉ាន់ប្រទេសនោះនឹងបង់ថ្លៃ។
ទន្ទឹមនឹងនោះ,រដ្ឋមន្ត្រីការបរទេសតៃវ៉ាន់ លោក Joseph Wu កំពុងធ្វើដំណើរទៅកាន់ទ្វីបអឺរ៉ុប ដើម្បីពង្រឹងទំនាក់ទំនងជាមួយប្រទេសនានាក្នុងទ្វីបនេះ។
លោក Wang បាននិយាយថា សហរដ្ឋអាមេរិក និងប្រទេសផ្សេងទៀតកំពុងព្យាយាមពង្រីកបញ្ហានៅតៃវ៉ាន់ ប៉ុន្តែថាសកម្មភាពបែបនេះផ្ទុយទៅនឹងការប្តេជ្ញាចិត្តដែលពួកគេបានធ្វើនៅពេលបង្កើតទំនាក់ទំនងការទូតជាមួយប្រទេសចិន៕
