ប្រទេសចិននិងរុស្ស៊ីកំពុងជំរុញក្រុមប្រឹក្សាសន្តិសុខអង្គការសហប្រជាជាតិឱ្យបន្ធូរបន្ថយទណ្ឌកម្មលើប្រទេសកូរ៉េខាងជើង តាមរយៈការសើរើឡើងវិញនូវសេចក្តីព្រាងដំណោះស្រាយកាលពីឆ្នាំ២០១៩ ដើម្បីដកការហាមឃាត់លើការនាំចេញរូបចម្លាក់ អាហារសមុទ្រ និងវាយនភណ្ឌរបស់ទីក្រុងព្យុងយ៉ាង ដែលរួមបញ្ចូលទាំងការលើកលែងឱ្យមានការនាំចូលប្រេងចម្រាញ់។
តាមរយៈសេចក្តីព្រាងដំណោះស្រាយដែលត្រូវបានរៀបចំឡើងវិញនេះ ចិននិងរុស្ស៊ីចង់ឱ្យក្រុមប្រឹក្សាដែលមានសមាជិក១៥ប្រទេស ដកទណ្ឌកម្មទាំងនោះចេញ ដើម្បីលើកកម្ពស់ជីវភាពរស់នៅរបស់ប្រជាជនស៊ីវិលនៅក្នុងរដ្ឋឯកោកូរ៉េខាងជើង។
កូរ៉េខាងជើងបានរងទណ្ឌកម្មរបស់អង្គការសហប្រជាជាតិចាប់តាំងពីឆ្នាំ២០០៦មកលើកម្មវិធីអាវុធនុយក្លេអ៊ែរនិងមីស៊ីលផ្លោងរបស់ខ្លួន។
សេចក្តីព្រាងដំណោះស្រាយនេះក៏រួមបញ្ចូលវិធានការផ្សេងទៀត ដែលស្នើឡើងដំបូងដោយរុស្ស៊ីនិងចិនកាលពីជិតពីរឆ្នាំមុន រួមទាំងការដកបម្រាមលើជនជាតិកូរ៉េខាងជើងដែលធ្វើការនៅបរទេស និងការលើកលែងគម្រោងកិច្ចសហប្រតិបត្តិការផ្លូវដែកនិងផ្លូវអន្តរកូរ៉េពីការដាក់ទណ្ឌកម្ម។
អ្នកការទូតជាច្រើននាក់របស់អង្គការសហប្រជាជាតិ ដែលសុំមិនបញ្ចេញឈ្មោះ បាននិយាយថា សេចក្តីព្រាងដំណោះស្រាយនេះទំនងជាទទួលបានសម្លេងគាំទ្រតិចតួច។ ក្នុងឆ្នាំ២០១៩ រុស្ស៊ីនិងចិនបានរៀបចំការចរចាក្រៅផ្លូវការចំនួនពីរលើកលើសេចក្ដីព្រាងនេះ ប៉ុន្ដែមិនបានកំណត់ឱ្យមានការបោះឆ្នោតជាផ្លូវការនោះទេ។
ក្រុមអ្នកការទូតបានបញ្ជាក់ថា ដំណោះស្រាយមួយត្រូវការសម្លេងគាំទ្រចំនួនប្រាំបួន ហើយមិនត្រូវវេតូ (ជំទាស់) ដោយសហរដ្ឋអាមេរិក បារាំង អង់គ្លេស រុស្ស៊ី ឬចិនឡើយ ដើម្បីអនុម័តបាន៕
