ប្រធានាធិបតីសហរដ្ឋអាមេរិកលោក ចូ បៃឌិន បានធ្វើការរិះគន់លើមេដឹកនាំចិននិងរុស្ស៊ី ដែលមិនបង្ហាញវត្តមានផ្ទាល់នៅឯកិច្ចប្រជុំកំពូលស្ដីពីការបម្រែបម្រួលអាកាសធាតុ (COP26)។ ក្នុងសុន្ទរកថាមួយកាលពីយប់ថ្ងៃអង្គារ លោក បៃឌិន បានមានប្រសាសន៍ថា អាកាសធាតុគឺជា “បញ្ហាដ៏ធំ” ហើយប្រទេសចិន “បានដើរចេញ” ដោយវាជារឿងដូចគ្នាជាមួយប្រទេសរុស្ស៊ីនិងលោក ពូទីន។
លោក បៃឌិន បានថ្លែងថា៖ “ការពិតដែលថាប្រទេសចិនកំពុងព្យាយាមអះអាងខ្លួនក្នុងតួនាទីថ្មីថាជាមេដឹកនាំពិភពលោក ប៉ុន្ដែមិនមកបង្ហាញមុខ គឺជាកំហុសដ៏ធំមួយ”។ លោកប្រធានាធិបតីបានបន្ដថា៖ “តំបន់ព្រៃឈើរបស់រុស្ស៊ីកំពុងរងការឆេះ ហើយប្រធានាធិបតីរបស់ប្រទេសនេះសុខចិត្តសំងំនៅស្ងៀមមិននិយាយពីបញ្ហានេះ”។ គួរបញ្ជាក់ផងដែរថា ទាំងប្រធានាធិបតីរុស្ស៊ី លោក វ្ល៉ាឌីមៀ ពូទីន និងមេដឹកនាំចិន លោក ស៊ី ជីនពីង មិនមានវត្តមាននៅក្នុងកិច្ចប្រជុំកំពូលនេះឡើយ ប៉ុន្ដែប្រទេសទាំងពីរបានបញ្ជូនក្រុមគណៈប្រតិភូឱ្យទៅចូលរួមដោយផ្ទាល់ក្នុងដំណើរការកិច្ចប្រជុំនេះ។
បច្ចុប្បន្ន ចិនគឺជាប្រទេសបញ្ចេញឧស្ម័នកាបូនឌីអុកស៊ីតធំជាងគេលំដាប់ទី១លើពិភពលោក និងសហរដ្ឋអាមេរិកស្ថិតក្នុងលំដាប់ទី២ ហើយរុស្ស៊ីជាប្រទេសជាប់ចំណាត់ថ្នាក់លេខ៥ បន្ទាប់ពីសហភាពអឺរ៉ុបនិងប្រទេសឥណ្ឌា។ មេដឹកនាំពិភពលោកជាង ១២០ រូបបានបង្ហាញខ្លួននៅក្នុងកិច្ចប្រជុំដ៏សំខាន់នេះ។ មេដឹកនាំចិនបានប្រកាសមិនចូលរួមដោយផ្ទាល់ដោយសារតែបញ្ហាមេរោគកូវីដ-១៩ក្នុងស្រុក ដោយឡែកប្រទេសរុស្ស៊ីមិនបានបញ្ជាក់ពីហេតុផលនៃការមិនចូលរួមដោយផ្ទាល់ឡើយ ប៉ុន្ដែនៅតែបន្ដអះអាងថា ការប្រែប្រួលអាកាសធាតុគឺជា “អាទិភាពសំខាន់” សម្រាប់រុស្ស៊ី៕
