នាយករដ្ឋមន្ត្រីជប៉ុនដែលទើបជាប់ឆ្នោតលោក Fumio Kishida បាននិយាយកាលពីថ្ងៃព្រហស្បតិ៍ថា លោកអាចនឹងទទួលតួនាទីបន្ថែមជារដ្ឋមន្ត្រីការបរទេស រហូតដល់ពេលដែលគណៈរដ្ឋមន្ត្រីថ្មីត្រូវបានបង្កើតឡើងនៅចុងខែនេះ។
លោក Kishida បានជ្រើសរើសរដ្ឋមន្ត្រីការបរទេសលោក Toshimitsu Motegi សម្រាប់តំណែងលំដាប់ទី២ក្នុងគណបក្សប្រជាធិបតេយ្យសេរីដែលកំពុងកាន់អំណាច (LDP)។ គណបក្ស LDP នឹងរៀបចំកិច្ចប្រជុំថ្នាក់ដឹកនាំកំពូលមួយនៅថ្ងៃព្រហស្បតិ៍នេះ ដើម្បីបញ្ជាក់ពីការតែងតាំង។
គួរបញ្ជាក់ផងដែរថា លោក Kishida បានដឹកនាំគណបក្ស LDP និងទទួលបានលទ្ធផលបោះឆ្នោតខ្ពស់ជាងការរំពឹងទុកកាលពីថ្ងៃអាទិត្យ ដោយគណបក្សនេះរក្សាសម្លេងភាគច្រើនរបស់ខ្លួននៅក្នុងសភាជាន់ទាប។
សភាគ្រោងនឹងបើកសម័យប្រជុំពិសេសនៅថ្ងៃទី១០ ខែវិច្ឆិកា ដើម្បីទទួលស្គាល់លោក Kishida ជានាយករដ្ឋមន្ត្រី។ លោកត្រូវបានគេរំពឹងថានឹងរៀបចំគណៈរដ្ឋមន្ត្រីថ្មី ដែលទំនងជាមិនមានការផ្លាស់ប្តូរច្រើនទេ លើកលែងតែតំណែងរដ្ឋមន្ត្រីការបរទេស។
លោកនាយករដ្ឋមន្ត្រី Kishida ដែលធ្លាប់មានតួនាទីជារដ្ឋមន្ត្រីការបរទេសស្រាប់ បានប្រាប់អ្នកយកព័ត៌មានថា៖ “រហូតដល់ពេលមានគណៈរដ្ឋមន្ត្រីថ្មី ខ្ញុំក៏កំពុងគិតចង់បំពេញតួនាទីជារដ្ឋមន្ត្រីការបរទេសផងដែរ”៕
