លោកស្រី Michelle Wu បានបង្កើតប្រវត្តិសាស្ត្រថ្មី បន្ទាប់ពីត្រូវបានបោះឆ្នោតជ្រើសតាំងជាអភិបាលក្រុង Boston។ លោកស្រីបានក្លាយជាស្ត្រីដំបូងគេបង្អស់និងមិនមែនជាជនជាតិស្បែកស ដែលត្រូវបានជ្រើសតាំងឱ្យចូលកាន់តំណែងនេះមិនធ្លាប់មានក្នុងរយៈពេលជិត២០០ឆ្នាំ។
លោកស្រីបានថ្លែងសារទៅកាន់អ្នកគាំទ្រថា៖ “ពីគ្រប់ជ្រុងនៃទីក្រុងរបស់យើង ទីក្រុងបូស្តុនបានបន្លឺសម្លេង។ យើងបានត្រៀមខ្លួនរួចរាល់សម្រាប់ពេលនេះ ហើយយើងបានត្រៀមខ្លួនរួចជាស្រេចដើម្បីក្លាយជាទីក្រុងបូស្ដុនសម្រាប់អ្នករាល់គ្នា”។
លោកស្រីបានបន្ដថា៖ “ខ្ញុំចង់បញ្ជាក់ឱ្យបានច្បាស់ថា ចក្ខុវិស័យរបស់ខ្ញុំមិនមែនស្ថិតលើសន្លឹកឆ្នោតទេ ប៉ុន្ដែវាស្ថិតលើអ្នកទាំងអស់គ្នា”។
គួរបញ្ជាក់ផងដែរថា លោកស្រី Michelle Wu
បានប្រជែងយកតំណែងចៅហ្វាយក្រុងបូស្ដុនជាមួយលោកស្រី Annissa Essaibi George ដែលធ្លាប់បម្រើការងារជាសមាជិកក្រុមប្រឹក្សាក្រុង។ ទាំងលោកស្រី Michelle Wu និងលោកស្រី Annissa Essaibi George បានកើតនិងធំធាត់នៅទីក្រុងបូស្ដុន។
លោកស្រី Essaibi George បានថ្លែងសារអបអរសាទរដល់លោកស្រី Michelle Wu ដែលបានក្លាយជាស្ត្រីទីមួយ និងជាជនជាតិអាមេរិកាំងដើមកំណើតអាស៊ីដំបូងគេដែលត្រូវបានជ្រើសរើសឱ្យធ្វើជាអភិបាលក្រុងបូស្តុន៕
