អន្តរជាតិ៖អង្គការសុខភាពពិភពលោក(WHO)និយាយថា ខ្លួនបានអនុម័តអោយប្រើប្រាស់ជាបន្ទាន់នូវវ៉ាក់សាំងការពារមេរោគកូវីដ-១៩ដែលផលិតនៅក្នុងប្រទេសឥណ្ឌា។
អង្គការសុខភាពពិភពលោកបានប្រកាសកាលពីថ្ងៃពុធថាខ្លួនបានបន្ថែមវ៉ាក់សាំង Covaxin ផលិតដោយក្រុមហ៊ុនឥណ្ឌា Bharat Biotech ទៅក្នុងបញ្ជីប្រើប្រាស់បន្ទាន់របស់ខ្លួន បន្ទាប់ពីបានបញ្ជាក់ពីប្រសិទ្ធភាព និងសុវត្ថិភាពរបស់វ៉ាក់សាំង។
អង្គការWHOបានអោយដឹងថាក្រោយពេលចាក់វ៉ាក់សាំងទាំងពីរដូសរយៈពេល១៤ថ្ងៃឬច្រើនជាងនេះ វ៉ាក់សាំងខាងលើត្រូវបានគេរកឃើញថាមានប្រសិទ្ធភាពការពារមិនអោយមានជំងឺធ្ងន់ធ្ងររហូតដល់៧៨ភាគរយ។ មន្ត្រីអង្គការសុខភាពពិភពលោកបាននិយាយថា វ៉ាក់សាំងផលិតនៅក្នុងប្រទេសឥណ្ឌានេះគឺសមស្របសម្រាប់ការប្រើប្រាស់នៅក្នុងប្រទេសកំពុងអភិវឌ្ឍន៍ព្រោះវាអាចរក្សាទុកក្នុងទូទឹកកកធម្មតាបានយ៉ាងងាយស្រួល។
គួរជ្រាបថាការបន្ថែមវ៉ាក់សាំងនៅក្នុងបញ្ជីរបស់អង្គការសុខភាពពិភពលោកនេះមានន័យថាវ៉ាក់សាំង Covaxin អាចត្រូវបានផ្តល់ជូនដល់ប្រទេសកំពុងអភិវឌ្ឍន៍តាមរយៈកម្មវិធី COVAX ដែលគាំទ្រដោយអង្គការសហប្រជាជាតិសម្រាប់ការចែកចាយវ៉ាក់សាំងដោយយុត្តិធម៌។
ដំបូងឡើយ,មជ្ឈមណ្ឌល COVAX ត្រូវបានគេរំពឹងថានឹងចែកចាយវ៉ាក់សាំងចំនួន ២ ពាន់លានដូសក្នុងឆ្នាំនេះ។ ប៉ុន្តែរហូតមកទល់ពេលនេះមជ្ឈមណ្ឌលទើបតែបានចែកចាយវ៉ាក់សាំងបានចំនួន ៤៣៥ លានដូសប៉ុណ្ណោះដោយសារការឆ្លងរីករាលដាលនៅជុំវិញពិភពលោក និងប្រទេសអភិវឌ្ឍន៍មានការយឺតយ៉ាវក្នុងការផ្តល់មូលនិធិ និងកម្រិតវ៉ាក់សាំង។
បច្ចុប្បន្នអង្គការ WHO បានអនុញ្ញាតិអោយប្រើប្រាស់ជាបន្ទាន់នូវវ៉ាក់សាំងកូវីដ-១៩ដែលបង្កើតឡើងដោយក្រុមហ៊ុន Pfizer-BioNTech, Moderna, AstraZeneca, Johnson & Johnson និងក្រុមហ៊ុនឱសថចិនចំនួនពីរ៕
