អន្តរជាតិ៖ប្រធានាធិបតីរុស្ស៊ី លោក វ្ល៉ាឌីមៀ ពូទីន បានធ្វើទស្សនកិច្ចនៅតំបន់គ្រីមៀ ដែលប្រទេសរបស់លោកបានបញ្ចូលកាលពី៧ឆ្នាំមុន ហើយបានអះអាងថា តំបន់នេះនឹងនៅតែជាផ្នែកមួយនៃប្រទេសរុស្ស៊ីជារៀងរហូត។ លោកពូទីនកាលពីថ្ងៃព្រហស្បតិ៍ បានទៅបំពេញទស្សនកិច្ចនៅទីក្រុងកំពង់ផែយោធា Sevastopol នៃឧបទ្វីប Crimeaនិងបានថ្លែងសុន្ទរកថាដើម្បីប្រារព្ធទិវាឯកភាពជាតិ។
លោកបានសង្កត់ធ្ងន់ថា គ្រីមៀនឹងស្ថិតនៅជាមួយរុស្ស៊ីជារៀងរហូត ព្រោះនោះជាឆន្ទៈអធិបតេយ្យភាព សេរី និងមិនអាចកាត់ចេញបានរបស់ប្រជាជនរុស្ស៊ីទាំងមូល។ សហរដ្ឋអាមេរិក និងបណ្តាប្រទេសអឺរ៉ុបបានដាក់ទណ្ឌកម្មសេដ្ឋកិច្ចលើរុស្ស៊ី ជុំវិញការបញ្ចូលឧបទ្វីបគ្រីមេ។ ពួកគេនិយាយថាឧបទ្វីបនេះជាទឹកដីរបស់អ៊ុយក្រែន។
ប្រព័ន្ធផ្សព្វផ្សាយរុស្ស៊ីបានរាយការណ៍កាលពីថ្ងៃព្រហស្បតិ៍ថា កងទ័ពជើងទឹករុស្ស៊ីដែលឈរជើងនៅក្នុងទីក្រុង Sevastopol កំពុងតាមដានយ៉ាងយកចិត្តទុកដាក់លើសមយុទ្ធយោធាធ្វើឡើងដោយអង្គការសន្ធិសញ្ញាអាត្លង់ទិកខាងជើង (NATO) នៅសមុទ្រខ្មៅដែលនៅក្បែរនឹងឧបទ្វីបនេះ។
កងទ័ពជើងទឹកអាមេរិកក៏កំពុងចូលរួមក្នុងសមយុទ្ធនេះដែរ។ របាយការណ៍ខាងលើបានបង្ហាញថា រុស្ស៊ីមានការភ័យខ្លាចចំពោះចំណាត់ការរបស់សហរដ្ឋអាមេរិក និងបណ្តាប្រទេសនៅអឺរ៉ុប។
អ្នកនាំពាក្យក្រសួងការបរទេសអាមេរិក លោក Ned Price បានថ្លែងកាលពីថ្ងៃព្រហស្បតិ៍ថា រដ្ឋមន្ត្រីការបរទេសអ៊ុយក្រែននឹងធ្វើទស្សនកិច្ចនៅទីក្រុងវ៉ាស៊ីនតោននៅសប្តាហ៍ក្រោយ។ លោកបានបញ្ជាក់ថា សហរដ្ឋអាមេរិកនឹងបញ្ជាក់ជាថ្មីនូវការប្ដេជ្ញាចិត្តនិងការគាំទ្រចំពោះអធិបតេយ្យភាពនិងបូរណភាពទឹកដីរបស់អ៊ុយក្រែនទាក់ទងនឹងតំបន់គ្រីមៀ៕
