អន្តរជាតិ៖រដ្ឋមន្ត្រី Brexit របស់អង់គ្លេសលោក David Frost និងរដ្ឋមន្ត្រីការបរទេសបារាំងទទួលបន្ទុកកិច្ចការអឺរ៉ុប លោក Clement Beaune បានជួបចរចារគ្នានៅទីក្រុងប៉ារីសកាលពីថ្ងៃព្រហស្បតិ៍ ដើម្បីបន្ធូបន្ថយភាពតានតឹងជំវិញជម្លោះនេសាទរវាងប្រទេសទាំងពីរ។ទោះជាយ៉ាងណាក៏ដោយលោក Beaune បាននិយាយបន្ទាប់ពីជំនួបនោះថាការងារជាច្រើននៅតែត្រូវការបំពេញបន្ថែមទៀតព្រោះភាពខុសគ្នាសំខាន់ៗនៅតែមាន។
យោងតាមប្រព័ន្ធផ្សព្វផ្សាយបារាំង ចំណុចជាប់គាំងសំខាន់ក្នុងអំឡុងកិច្ចពិភាក្សាកាលពីថ្ងៃព្រហស្បតិ៍គឺការបកស្រាយនៃកិច្ចព្រមព្រៀងក្រោយ Brexit ស្តីពីការនេសាទ។ បារាំងបានចោទអង់គ្លេសថាបានដាក់លក្ខខណ្ឌតឹងរ៉ឹងជាងមុនសម្រាប់ការចេញលិខិតនេសាទ។
កាលពីសប្តាហ៍មុន ក្រសួងសមុទ្របារាំងបានឆ្លើយតបដោយប្រកាសថាចាប់ពីថ្ងៃអង្គារសប្ដាហ៍នេះតទៅ នាវានេសាទអង់គ្លេសនឹងត្រូវបានហាមឃាត់មិនឱ្យចូលចតនៅកំពង់ផែបារាំងចំនួន៦នៅតំបន់ Hauts-de-France, Normandy និង Brittany ។ ក្រសួងក៏បានអោយដឹងទៀតថា ប្រទេសបារាំងនឹងពង្រឹងការត្រួតពិនិត្យអនាម័យ គយ និងសុវត្ថិភាពលើនាវា និងរថយន្តដឹកទំនិញមកពីអង់គ្លេស។តែយ៉ាងណាក៏ដោយ, ប្រធានាធិបតីបារាំង Emmanuel Macron ក្រោយមកបានច្រានចោលវិធានការសងសឹកទាំងនេះ ដោយនិយាយថា “ដរាបណាយើងកំពុងចរចា យើងនឹងមិនដាក់ទណ្ឌកម្មឡើយ”។
ទន្ទឹមគ្នានេះ,អ្នកនាំពាក្យរបស់នាយករដ្ឋមន្ត្រីអង់គ្លេស Boris Johnson បានប្រាប់សារព័ត៌មានកាលពីថ្ងៃព្រហស្បតិ៍ថា បារាំងបានយល់ព្រមមិន “បន្តការគំរាមកំហែងទាំងនេះ”។ លោកបានបន្ថែមថា៖ «ភាគីទាំងពីរចង់មានការពិភាក្សាបន្ថែមទៀត»។
យោងតាមលោក Beaune ការចរចារបន្ថែមទៀតនឹងត្រូវធ្វើឡើងនៅដើមសប្តាហ៍ក្រោយ៕
