ប្រទេសឥណ្ឌូនេស៊ីបានរិះគន់លក្ខខណ្ឌនៃកិច្ចព្រមព្រៀងសកលដើម្បីបញ្ចប់ការកាប់បំផ្លាញព្រៃឈើនៅឆ្នាំ២០៣០ ដែលជាសញ្ញាមួយបញ្ជាក់ថា ប្រទេសនេះប្រហែលជាមិនអាចសម្រេចគោលដៅបានឡើយ។
រដ្ឋមន្ត្រីក្រសួងបរិស្ថានឥណ្ឌូនេស៊ីលោកស្រី Siti Nurbaya Bakar បាននិយាយថា អាជ្ញាធរមិនអាចសន្យាអ្វីដែលមិនធ្វើបាននោះទេ។ លោកស្រីបានបញ្ជាក់ថា ការបង្ខំប្រទេសឥណ្ឌូណេស៊ីឱ្យប្ដេជ្ញាចិត្តឆ្ពោះទៅរកការឈប់កាប់បំផ្លាញព្រៃឈើទាំងស្រុងនៅត្រឹមឆ្នាំ២០៣០គឺជារឿង “មិនសមរម្យ និងអយុត្តិធម៌”។
បើទោះបីជាប្រធានាធិបតីឥណ្ឌូនេស៊ីលោក Joko Widodo បានចុះហត្ថលេខាលើកិច្ចព្រមព្រៀងព្រៃឈើក៏ដោយ លោកស្រីបានថ្លែងថា ការអភិវឌ្ឍនៅតែជាអាទិភាពកំពូលរបស់ឥណ្ឌូនេស៊ី។
កិច្ចព្រមព្រៀងមួយដែលបានទទួលការយល់ព្រមពីមេដឹកនាំពិភពលោកជាង ១០០ រូបត្រូវបានប្រកាសកាលពីថ្ងៃចន្ទ នៅឯកិច្ចប្រជុំកំពូលអាកាសធាតុ COP26 នៅទីក្រុង Glasgow ។ វាជាការប្រកាសក្នុងទ្រង់ទ្រាយធំជាលើកដំបូងរបស់ព្រឹត្តិការណ៍នេះ។ កិច្ចព្រមព្រៀងនេះបានសន្យាថានឹងបញ្ចប់ការកាប់បំផ្លាញព្រៃឈើនៅឆ្នាំ២០៣០ហើយរួមបញ្ចូលទាំងមូលនិធិសាធារណៈនិងឯកជនជិត ១៩.២ ពាន់លានដុល្លារ ដើម្បីធ្វើកិច្ចការនេះ។
ក្នុងសារមួយបង្ហោះលើហ្វេសប៊ុក (ជាភាសាឥណ្ឌូនេស៊ី) លោកស្រី Nurbaya បានអះអាងថា ធនធានធម្មជាតិដ៏ធំរបស់ប្រទេសនេះត្រូវតែប្រើប្រាស់សម្រាប់ជាប្រយោជន៍ដល់ប្រជាជនរបស់ខ្លួន។ លោកស្រីក៏បានលើកឡើងពីតម្រូវការកាប់ព្រៃឈើ ដើម្បីកសាងផ្លូវថ្មីផងដែរ៕
