ប្រធានាធិបតីសហរដ្ឋអាមេរិកលោក ចូ បៃឌិន បានប្រកាសថា ច្បាប់មួយចំនួនសម្រាប់វិស័យឯកជនប្រើប្រាស់ដើម្បីទប់ស្កាត់ការចម្លងមេរោគកូវីដ-១៩តាមរយៈការចាក់វ៉ាក់សាំងនិងការធ្វើតេស្ដរៀងរាល់សប្តាហ៍ នឹងចាប់ផ្ដើមអនុវត្តចាប់ពីថ្ងៃទី៤ ខែមករា ឆ្នាំក្រោយតទៅ ប៉ុន្ដែការប្រកាសរបស់លោកប្រធានាធិបតីនេះបានរងការរិះគន់ពីបក្សប្រឆាំងថា លោកបានបំពានអំណាចខ្លួន។
លោក បៃឌិន បានមានប្រសាសន៍ថា៖ “មុននេះខ្ញុំគិតថា តម្រូវការចាក់វ៉ាក់សាំងនេះគឺមិនចាំបាច់ឡើយ ប៉ុន្ដែមនុស្សជាច្រើនមិនព្រមចាក់វ៉ាក់សាំង ដើម្បីឱ្យយើងអាចរួចផុតពីស្ថានភាពជំងឺឆ្លងរាតត្បាតនេះបាន។ ដូច្នេះ ខ្ញុំសម្រេចចិត្តថាឱ្យវាក្លាយជាកាតព្វកិច្ច ហើយវាពិតជាមានប្រសិទ្ធភាពមែន”។
ក្នុងរយៈពេលប៉ុន្មានម៉ោងបន្ទាប់ពីការប្រកាសនេះ អភិបាលរដ្ឋមួយចំនួនមកពីរដ្ឋ Florida រដ្ឋ Iowa និងរដ្ឋ Indiana បានប្តេជ្ញាប្រឆាំងនឹងច្បាប់ថ្មីនេះ ដោយលើកហេតុផលថា វាជាការរំលោភលើសិទ្ធិសេរីភាពបុគ្គល។
បើទោះបីជាការប្រឆាំងផ្នែកនយោបាយមានការកើនឡើងក្ដី ការសម្រេចចិត្តអនុវត្តច្បាប់លើវិស័យឯកជននេះទំនងជាអាចប៉ះពាល់ដល់កម្លាំងពលកម្ម ដែលកំពុងខ្វះខាតស្រាប់ ក្នុងរដូវឈប់សម្រាក។ រដ្ឋបាលរបស់លោកប្រធានាធិបតីបានបញ្ជាក់ថា បុគ្គលិកផ្នែកសុខាភិបាលដែលធ្វើការក្រោមកម្មវិធីថែទាំសុខភាពរបស់រដ្ឋាភិបាល Medicare និង Medicaid ក៏នឹងត្រូវចាក់វ៉ាក់សាំងឱ្យបានមុនថ្ងៃកំណត់ចុងក្រោយនេះផងដែរ។
ច្បាប់ថ្មីនេះនឹងមានការគ្រប់ដណ្ដប់លើបុគ្គលិកក្នុងវិស័យឯកជនចំនួន ៨៤.៣ លាននាក់និងនិយោជកផ្នែកឯកជនចំនួន ១.៩ លាននាក់ ប៉ុន្ដែសម្រាប់បុគ្គលិកប្រហែល ១៨.៥ លាននាក់ផ្សេងទៀតត្រូវបានលើកលែង ដោយសារតែពួកគេធ្វើការនៅតំបន់ដាច់ស្រយាល។
ជាមធ្យម ពលរដ្ឋអាមេរិកប្រហែល ១,១០០ នាក់អាចប្រឈមមុខនឹងការស្លាប់ជារៀងរាល់ថ្ងៃ ដោយសារជំងឺកូវីដ-១៩ ដែលភាគច្រើនពួកគេមិនបានទទួលថ្នាំបង្ការ។ រហូតមកទល់ពេលនេះ ជំងឺកូវីដ-១៩បានផ្ដាច់ជីវិតពលរដ្ឋអាមេរិកជាង ៧៤៥,០០០ នាក់៕
