អន្តរជាតិ៖នាយករដ្ឋមន្ត្រីអ៊ីរ៉ាក់លោក Mustafa al-Kadhimi បាននិយាយកាលពីថ្ងៃអាទិត្យថា លោកបានកំណត់អត្តសញ្ញាណជនដៃដល់នៃការប៉ុនប៉ងធ្វើឃាតដែលបរាជ័យលើគេហដ្ឋានរបស់លោកក្នុងរដ្ឋធានីបាកដាដ។
ការិយាល័យព័ត៌មានរបស់នាយករដ្ឋមន្ត្រីបាននិយាយនៅក្នុងសេចក្ដីថ្លែងការណ៍មួយថា៖ «យើងនឹងតាមចាប់អ្នកដែលបានប្រព្រឹត្តបទឧក្រិដ្ឋនេះ។ យើងស្គាល់ពួកគេយ៉ាងច្បាស់ ហើយយើងនឹងបង្ហាញអត្តសញ្ញាណរបស់ពួកគេ»។
ការប៉ុនប៉ង់ទាំងនេះគឺដូចគ្នាទៅនឹងការលួចធ្វើឃាតលោក Nibras Farman ដែលជាមន្ត្រីសេវាស៊ើបការណ៍សម្ងាត់ជាតិអ៊ីរ៉ាក់ (INIS) ហើយពួកគេនឹងត្រូវបាននាំទៅកាត់ទោស,លោក al-Kadhimi បានថ្លែងយ៉ាងដូច្នេះ។
កាលពីព្រឹកថ្ងៃអាទិត្យ, លោក al-Kadhimi បានរត់គេចខ្លួនដោយសុវត្ថិភាពនិងគ្មានគ្រោះថ្នាក់ពីការប៉ុនប៉ងធ្វើឃាតដោយយន្តហោះដ្រូននៅលើគេហដ្ឋានរបស់គាត់នៅក្នុងតំបន់បៃតងដែលមានសន្ដិសុខតឹងរឹង។
គួរជ្រាបថាការប៉ុនប៉ងធ្វើឃាតនេះបានកើតឡើងចំពេលមានការតវ៉ាពីសំណាក់អ្នកគាំទ្រគណបក្សនយោបាយដែលបដិសេធលទ្ធផលបោះឆ្នោតកាលពីខែមុន។
កាលពីថ្ងៃសុក្រកន្លងទៅ, ការតវ៉ាបានកើនឡើងដល់ការប៉ះទង្គិចគ្នាជាមួយកងកម្លាំងសន្តិសុខនៅច្រកចូលតំបន់បៃតង ដែលនាំឱ្យមានការស្លាប់របស់ក្រុមបាតុករពីរនាក់ និងរបួសសមាជិកសន្តិសុខនិងអ្នកតវ៉ារាប់សិបនាក់។
នៅក្នុងការបោះឆ្នោតសភាកាលពីថ្ងៃទី ១០ ខែតុលា, ចលនា Sadrist ដែលដឹកនាំដោយបព្វជិតនិកាយស៊ីអ៊ីតដ៏លេចធ្លោលោក Moqtada al-Sadr បាននាំមុខដោយមានអាសនៈច្រើនជាង ៧០ ខណៈដែលសម្ព័ន្ធ al-Fatah ទទួលបាន ១៧ អាសនៈ បើធៀបនឹង ៤៧ អាសនៈនៅក្នុងការបោះឆ្នោតឆ្នាំ២០១៨។
អ្នកគាំទ្រគណបក្សនយោបាយដែលបដិសេធលទ្ធផលបោះឆ្នោតបានចេញដើរតាមដងផ្លូវក្នុងទីក្រុងជាច្រើនរបស់អ៊ីរ៉ាក់ រួមទាំងរដ្ឋធានីបាកដាដ នៅពេលដែលគណៈកម្មាធិការរៀបចំការបោះឆ្នោតឯករាជ្យរបស់អ៊ីរ៉ាក់នៅតែពិចារណាលើការអំពាវនាវ និងបណ្តឹងដែលដាក់ដោយគណបក្សនយោបាយ៕
