អន្តរជាតិ៖អគ្គលេខាធិការរងអង្គការសហប្រជាជាតិទទួលបន្ទុកកិច្ចការនយោបាយអ្នកស្រី Rosemary DiCarlo បានព្រមានកាលពីថ្ងៃចន្ទថា ជម្លោះនៅភាគខាងជើងប្រទេសអេត្យូពីនឹង ធ្វើឱ្យអនាគតប្រទេស និងប្រជាជនធ្លាក់ក្នុងភាពមិនច្បាស់លាស់យ៉ាងធ្ងន់ធ្ងរ។នេះបើយោងតាមការចុះផ្សាយរបស់សារព័ត៌មានចិនស៊ីនហ៊ួរនៅថ្ងៃទី០៩ខែវិច្ឆិកាឆ្នាំ២០២១។
អ្នកស្រី DiCarlo បានប្រាប់ក្រុមប្រឹក្សាសន្តិសុខនៅក្នុងសន្និសីទសង្ខេបមួយថា៖«ជម្លោះរយៈពេលមួយឆ្នាំនៅក្នុងតំបន់ Tigray ប្រទេសអេត្យូពីបានឈានដល់ភាពបែកបាក់ដ៏មហន្តរាយ។ ការប្រយុទ្ធគ្នាបានធ្វើឱ្យអនាគតប្រទេស និងប្រជាជនរបស់ខ្លួន ក៏ដូចជាស្ថិរភាពតំបន់ Horn នៃទ្វីបអាហ្រ្វិកកាន់តែមានភាពមិនច្បាស់លាស់»។អ្នកស្រីបានធ្វើការកត់ស្គាល់ថាក្នុងរយៈពេលប៉ុន្មានថ្ងៃថ្មីៗនេះ កងកម្លាំង Tigrayan បានប្រយុទ្ធឆ្ពោះទៅភាគខាងត្បូងនៃទីក្រុង Addis Ababa ដែលជារដ្ឋធានីនៃប្រទេសអេត្យូពី ដោយធ្វើសកម្មភាពក្នុងការសម្របសម្រួលជាមួយកងទ័ពរំដោះ Oromo ។ រដ្ឋាភិបាលសហព័ន្ធនៃប្រទេសអេត្យូពីបានប្រកាសដាក់រដ្ឋក្នុងភាពអាសន្ន ហើយបាននិយាយថា ខ្លួនកំពុងប្រយុទ្ធនឹង «សង្រ្គាមអត្ថិភាព»។ជាមួយគ្នានេះ, អសន្តិសុខនៅក្នុងតំបន់ Oromia កាន់តែបន្តអាក្រក់ទៅៗ ខណៈដែលស្ថានភាពនៅក្នុងផ្នែកខ្លះនៃតំបន់ Benishangul-Gumuz នៅតែមានភាពតានតឹង។
«មានការរំពឹងទុកជាច្រើនទាក់ទងនឹងរបៀបដែលវិបត្តិនេះនឹងកើតឡើងក្នុងរយៈពេលប៉ុន្មានសប្តាហ៍ខាងមុខនេះ។ នៅក្នុងប្រទេសដែលមានប្រជាជនជាង ១១០ លាននាក់ មានជនជាតិផ្សេងៗគ្នាជាង៩០ក្រុម និង ភាសាច្រើនជាង៨០ភាសានោះ, គ្មាននរណាម្នាក់អាចទស្សន៍ទាយបានថាតើការប្រយុទ្ធគ្នានិងភាពអសន្តិសុខនឹងបន្តវិវត្តន៍ទៅជាយ៉ាងណានោះទេ។ ប៉ុន្តែខ្ញុំដឹងច្បាស់ថា អ្វីដែលប្រាកដនោះគឺ ហានិភ័យនៃប្រទេសអេត្យូពី ធ្លាក់ចូលទៅក្នុងសង្គ្រាមស៊ីវិលកាន់តែធំ គឺប្រាកដជាកើតឡើងជាក់ជាមិនខាន ហើយសង្គ្រាមនោះនឹងនាំមកនូវមហន្តរាយមនុស្សធម៌ និងបំផ្លាញអនាគតរបស់ប្រទេសមួយនេះ»,អ្នកស្រីDiCarlo ព្រមាន។
លោកស្រីបានបន្ថែមថា ផលប៉ះពាល់ផ្នែកនយោបាយនៃការបង្កើនអំពើហិង្សានៅក្នុងតំបន់កាន់តែទូលំទូលាយនឹងមានវិសាលភាពធំធេង ដែលរួមផ្សំដោយវិបត្តិជាច្រើនដែលហ៊ុមព័ទ្ធតំបន់Hornនៃទ្វីបអាហ្វ្រិក៕
