អន្តរជាតិ៖លោកRandal Quarles អនុប្រធានមូលនិធិបម្រុងសហព័ន្ធអាមេរិកបានប្រកាសកាលពីថ្ងៃចន្ទថាលោកនឹងលាលែងពីធនាគារកណ្តាលនៅចុងខែធ្នូខាងមុខនេះ។លោក Quarles បានផ្ញើរលិខិតមួយទៅកាន់ប្រធានាធិបតីអាមេរិក Joe Bidenថា៖«បន្ទាប់ពីរយៈពេលជាង ៤ឆ្នាំក្នុងនាមជាសមាជិកនៃក្រុមប្រឹក្សាភិបាលនៃមូលនិធិបម្រុងសហព័ន្ធ ហើយបានបញ្ចប់អាណត្តិជាអនុប្រធានសម្រាប់ការត្រួតពិនិត្យក្រុមប្រឹក្សាភិបាលកាលពីខែមុន ខ្ញុំមានបំណងលាលែងពីតំណែងរបស់ខ្ញុំជាអនុប្រធានមូលនិធិបម្រុងសហព័ន្ធ»។
លោកបានថ្លែងថា៖«វាជាឯកសិទ្ធិដ៏អស្ចារ្យមួយក្នុងការធ្វើការជាមួយសហសេវិករបស់ខ្ញុំនៅក្នុងក្រុមប្រឹក្សាភិបាល នៃមូលនិធិបម្រុងសហព័ន្ធនិងក្នុងចំណោមសហគមន៍ធនាគារកណ្តាល និងនិយតកម្មពិភពលោក»។
ជុំវិញការប្រកាសលាលែងពីតំណែងរបស់លោក Quarlesនេះដែរ,សហព័ន្ធអាមេរិក បាននិយាយនៅក្នុងសេចក្តីថ្លែងការណ៍មួយថាលោក Quarles បានដើរ “តួនាទីស្នូល”មួយក្នុងការធានានូវប្រតិបត្តិការប្រកបដោយសុវត្ថិភាពទាំងប្រព័ន្ធហិរញ្ញវត្ថុក្នុងស្រុក និងអន្តរជាតិក្នុងអំឡុងពេលភាពតានតឹងនៃវិបត្តិជំងឺCOVID-19។
សូមជម្រាបជូនថាមុនពេលដែលគាត់ត្រូវបានតែងតាំងជាអនុប្រធានក្រុមប្រឹក្សាមូលនិធិបម្រុងសហព័ន្ធក្នុងខែតុលា ឆ្នាំ២០១៧, លោក Quarles គឺជាស្ថាបនិក និងជានាយកគ្រប់គ្រងក្រុមហ៊ុន The Cynosure Group ដែលជាក្រុមហ៊ុនវិនិយោគឯកជន។ គាត់ក៏បានបម្រើការក្នុងមុខតំណែងជាន់ខ្ពស់ជាច្រើននៅក្រសួងរតនាគារអាមេរិក និងជានាយកប្រតិបត្តិនៅមូលនិធិរូបិយវត្ថុអន្តរជាតិរបស់សហរដ្ឋអាមេរិកផងដែរ។
បើយោងតាមប្រព័ន្ធផ្សព្វផ្សាយអាមេរិក ការប្រកាសលាលែងពីតំណែងខាងលើនេះបានកើតឡើងនៅពេលដែលលោក Biden ត្រូវបានគេរំពឹងថានឹងប្រកាសថាតើលោកនឹងតែងតាំងលោក Jerome Powell ជាប្រធានមូលនិធិបម្រុងសហព័ន្ធអាមេរិក ក្នុងពេលឆាប់ៗនេះដែរឬទេ ខណៈអាណត្តិ ៤ឆ្នាំរបស់លោក Powell ជាប្រធានមូលនិធិបម្រុងសហព័ន្ធនឹងបញ្ចប់នៅក្នុងខែកុម្ភៈឆ្នាំ២០២២ខាងមុខនេះ៕
