សហរដ្ឋអាមេរិកចោទប្រកាន់ចោរអ៊ិនធឺណែតជនជាតិអ៊ុយក្រែននិងរុស្សី និងរឹបអូសបានប្រាក់៦លានដុល្លារ

ឯកសាររបស់តុលាការបានបង្ហាញកាលពីថ្ងៃចន្ទថា ក្រសួងយុត្តិធម៌សហរដ្ឋអាមេរិកបានចោទប្រកាន់ជនជាតិអ៊ុយក្រែននិងជនជាតិរុស្សីម្នាក់នៅក្នុងការវាយប្រហារតាមរយៈមេរោគចាប់ជំរិត (Ransomware) ដ៏អាក្រក់បំផុត ដែលមានគោលដៅលើសហរដ្ឋអាមេរិក។

សកម្មភាពចុងក្រោយរបស់សហរដ្ឋអាមេរិកអនុវត្តតាមវិធានការមួយចំនួនដែលបានធ្វើឡើងដើម្បីប្រយុទ្ធប្រឆាំងនឹងការកើនឡើងនៃមេរោគចាប់ជំរិត (Ransomware) ដែលបានវាយប្រហារលើក្រុមហ៊ុនធំៗមួយចំនួន រួមទាំងការវាយប្រហារលើក្រុមហ៊ុនបង្ហូរប្រេងដ៏ធំបំផុតនៅសហរដ្ឋអាមេរិក Colonial Pipeline ដែលបានធ្វើរាំងស្ទះដល់ការចែកចាយប្រេងនៅទូទាំងប្រទេសអស់រយៈពេលជាច្រើនថ្ងៃ។

តុលាការបានសម្រេចដាក់ការចោទប្រកាន់មួយលើជនជាតិអ៊ុយក្រែនលោក Yaroslav Vasinskyi ដែលត្រូវបានចាប់ខ្លួនក្នុងប្រទេសប៉ូឡូញកាលពីខែមុនថា បានលួចចូលក្រុមហ៊ុន Kaseya ដែលជាក្រុមហ៊ុនផ្តល់សេវាសូហ្វវែរនៅរដ្ឋផ្លរីដា កាលពីថ្ងៃទី៤ ខែកក្កដា។

ចាប់តាំងពីពេលនោះមក លោកនិងក្រុមជនសមគំនិតបានចម្លងមេរោគកុំព្យូទ័រឈ្មោះ REvil ransomware ទៅដល់អតិថិជនរបស់ក្រុមហ៊ុន Kaseya ប្រហែល ១,៥០០ នាក់ ហើយបានបំលែងកូដទិន្នន័យ (Encrypt) និងបានបង្ខំឱ្យអ្នកខ្លះបិទឧបករណ៍ជាច្រើនថ្ងៃ។

សូមជម្រាបជូនផងដែរថា ការចាប់ខ្លួននេះគឺជាផ្នែកមួយនៃការបោសសម្អាតជាបន្តបន្ទាប់ប្រឆាំងនឹងក្រុមចោរអ៊ិនធឺណែត ក្រោមការសម្របសម្រួលដោយភ្នាក់ងារ FBI ប៉ូលីស Europol និងអង្គការប៉ូលីសជាតិនៅទូទាំងទ្វីបអឺរ៉ុប ដោយមានជំនួយពីក្រុមហ៊ុនសន្តិសុខឯកជន៕