អតីតប្រធានាធិបតីសហរដ្ឋអាមេរិកលោក បារ៉ាក់ អូបាម៉ា បានអំពាវនាវឱ្យយុវជន “រក្សាកំហឹង” ក្នុងការប្រយុទ្ធប្រឆាំងនឹងការប្រែប្រួលអាកាសធាតុនៅឯកិច្ចប្រជុំកំពូលស្ដីពីការប្រែប្រួលអាកាសធាតុ COP26។
អតីតប្រធានាធិបតីរូបនេះបានជំរុញឱ្យក្រុមយុវជនដាក់សម្ពាធនយោបាយដើម្បីធ្វើឱ្យមានការផ្លាស់ប្តូរ ប៉ុន្តែបានព្រមានថា ពួកគេនឹងត្រូវទទួលយកការសម្របសម្រួលក្នុងដំណើរនេះ។
លោក អូបាម៉ា បានមានប្រសាសន៍ថា៖ “ពិភពលោកមិនស្ថិតចំអ្វីដែលយើងចង់បានឡើយ ក្នុងការជៀសវាងគ្រោះមហន្តរាយអាកាសធាតុនាពេលអនាគត”។ លោកបានរិះគន់លោក ដូណាល់ ត្រាំ ចំពោះការប្រទូសរ៉ាយលើផ្នែកវិទ្យាសាស្ត្រអាកាសធាតុ ប៉ុន្ដែលោកបានបញ្ជាក់ថា សហរដ្ឋអាមេរិកត្រៀមខ្លួនជាស្រេចដើម្បីដឹកនាំម្តងទៀត។
លោក អូបាម៉ា ក៏បានស្តីបន្ទោសមេដឹកនាំចិននិងរុស្ស៊ី ដែលមិនចូលរួមក្នុងកិច្ចប្រជុំកំពូល COP26 ដោយផ្ទាល់។
ថ្លែងក្នុងទីក្រុង Glasgow លោក អូបាម៉ា បានទទួលការអបអរសាទរយ៉ាងកងរំពង នៅពេលលោកឡើងឈរលើវេទិកានិងបញ្ចេញមតិនៅចុងបញ្ចប់នៃសុន្ទរកថារបស់លោក ប៉ុន្តែក្រុមសកម្មជនមួយចំនួនក៏បានលើកឡើងពីភាពបរាជ័យរបស់លោក។
ក្រុមសកម្មជនបានចាប់កំហុសក្នុងរដ្ឋបាលលោក អូបាម៉ា ដោយក្នុងនោះរួមមានការខកខានមិនបានបំពេញតាមសន្យាដ៏សំខាន់ក្នុងការផ្ដល់ប្រាក់ជំនួយ១០០ពាន់លានដុល្លារក្នុងមួយឆ្នាំពីប្រទេសអភិវឌ្ឍន៍ទៅឱ្យប្រទេសក្រីក្រ ដើម្បីប្រើប្រាស់លើវិស័យអាកាសធាតុ៕
