លោក សាជីដ ចាវីដ រដ្ឋមន្ត្រីសុខាភិបាលចក្រភពអង់គ្លេស បានថ្លែងចំពោះមុខសមាជិកសភាថា ការចាក់វ៉ាក់សាំងបង្ការជំងឺកូវីដ-១៩នឹងក្លាយជាកាតព្វកិច្ចសម្រាប់បុគ្គលិកជួរមុខរបស់សេវាកម្មសុខភាពជាតិរបស់ចក្រភពអង់គ្លេស (NHS)។ លោករំពឹងថា ខែមេសាឆ្នាំក្រោយគឺជាឱសានវាទសម្រាប់បុគ្គលិកជាង ១០៣,០០០នាក់ ដើម្បីចាក់វ៉ាក់សាំងដូសមូលដ្ឋាន។
លោករដ្ឋមន្ត្រីបានបញ្ជាក់ថា ការធ្វើដូចនេះគឺនឹងបន្ថែមការការពារមួយកម្រិតទៀតសម្រាប់ទាំងក្រុមគ្រូពេទ្យនិងអ្នកជំងឺ។ ប៉ុន្តែក៏មានការព្រួយបារម្ភថា ការអនុវត្តកាតព្វកិច្ចចាក់វ៉ាក់សាំងអាចធ្វើឱ្យបុគ្គលិកមួយចំនួនសម្រេចចិត្តចាកចេញពីការងារ ខណៈពេលដែលមន្ទីរពេទ្យកំពុងតែខ្វះខាតបុគ្គលិកស្រាប់។
លោក ចាវីដ បាននិយាយថា ច្រើនជាង ៩៣% នៃបុគ្គលិកជួរមុខរបស់ NHS បានចាក់ដូសទីមួយរួចហើយ ខណៈ ៩០%ទទួលបានទាំងពីរដូស។ ការសម្រេចចិត្តរបស់រដ្ឋាភិបាលត្រូវបានធ្វើឡើង បន្ទាប់ពីមានការពិគ្រោះយោបល់ថាតើក្រុមបុគ្គលិកសុខាភិបាលគួរតែចាក់ទាំងវ៉ាក់សាំងបង្ការជំងឺផ្ដាសាយនិងជំងឹកូវីដ-១៩ជាកំហិតឬយ៉ាងណា។
លោក ចាវីដ បានបញ្ជាក់ថា ការចាក់វ៉ាក់សាំងការពារជំងឺគ្រុនផ្តាសាយនឹងមិនត្រូវកំណត់ថាជាកាតព្វកិច្ចឡើយ។ ចំណែកឯបុគ្គលមួយចំនួន ក៏ទទួលបានការលើកលែងពុំចាំបាច់ចាក់វ៉ាក់សាំងផងដែរ ក្រោមហេតុផលសុខភាព ប៉ុន្ដែក្រុមនេះមិនអនុញ្ញាតឱ្យចូលព្យាបាលអ្នកជំងឺកូវីដ-១៩ឡើយ។
លោករដ្ឋមន្ត្រីបានសង្កត់ធ្ងន់ថា បុគ្គលិកដែលពុំទាន់ទៅចាក់វ៉ាក់សាំងពុំគួរគេចវេសឬរងការអាម៉ាសឡើយ ប៉ុន្ដែពួកគេគួរតែត្រូវបានលើកទឹកចិត្តឱ្យធ្វើរឿងវិជ្ជមានវិញ៕
