គណៈកម្មាធិការស៊ើបអង្កេតហេតុការណ៍កុប្បកម្មថ្ងៃទី៦ ខែមករា នៅវិមានកាពីតូលរបស់សហរដ្ឋអាមេរិកបានកោះហៅជំនួយការជិតស្និទ្ធបំផុតរបស់អតីតប្រធានាធិបតីសហរដ្ឋអាមេរិកលោក ដូណាល់ ត្រាំ ជាច្រើននាក់ផ្សេងទៀត ដើម្បីផ្តល់ភស្តុតាង។
ក្នុងចំណោមក្រុមមន្ត្រីជំនិតរបស់លោក ត្រាំ ចុងក្រោយដែលត្រូវបានកោះហៅរួមមាន អតីតអ្នកនាំពាក្យប្រចាំសេតវិមាន ទីប្រឹក្សាគោលនយោបាយជាន់ខ្ពស់ និងជំនួយការផ្ទាល់ខ្លួន។ ការស៊ើបអង្កេតកំពុងព្យាយាមស្វែងរកថាតើលោក ត្រាំ បានដឹងជាមុនជុំវិញការវាយប្រហារនេះឬយ៉ាងណា។
គួររំលឹកផងដែរថា កាលពីថ្ងៃទី៦ ខែមករា ដើមឆ្នាំនេះ ហ្វូងអ្នកគាំទ្ររបស់លោក ដូណាល់ ត្រាំ បានសម្រុកចូលវិមានកាពីតូល ដែលជាការិយាល័យធ្វើការរបស់មន្ត្រីជាន់ខ្ពស់ ដើម្បីបង្អាក់ការបញ្ជាក់ជាផ្លូវការថា លោក ចូ បៃឌិន ទទួលបានជ័យជំនះក្នុងការបោះឆ្នោត។
លោក ត្រាំ ត្រូវបានសភាចោទប្រកាន់ថាបានប្រព្រឹត្តបទល្មើសមួយចំនួន ប៉ុន្ដែការចោទប្រកាន់នេះត្រូវបានជម្រះទៅវិញដោយក្រុមសមាជិកសភា។ មនុស្សជាង៦៧០នាក់ត្រូវបានចាប់ខ្លួនពីបទលុកលុយវិមានកាពីតូល។
លោក ដូណាល់ ត្រាំ បានបញ្ជាក់ក្នុងសេចក្ដីថ្លែងការណ៍កាលពីថ្ងៃអង្គារថា ដីកាកោះហៅនេះត្រូវបានដាក់ចេញដោយគណៈកម្មការដែលបានចាត់តាំងនិងមានមហិច្ឆតាកេងបន្លំផ្នែកនយោបាយ។
ជំនួយការជិតស្និទ្ធបំផុតរបស់លោកចំនួន ១៦ រូបត្រូវបានកោះហៅក្នុងរយៈពេល ២ ថ្ងៃកន្លងមកនេះ ខណៈដែលអ្នកស៊ើបអង្កេតកំពុងតាមដានមនុស្សជំនិតបំផុតរបស់លោកអតីតប្រធានាធិបតីរូបនេះ៕
