ប្រធានាធិបតីចិន លោក ស៊ី ជីនពីង បានមានប្រសាសន៍កាលពីថ្ងៃព្រហស្បតិ៍ថា តំបន់អាស៊ី-ប៉ាស៊ីហ្វិកមិនត្រូវត្រឡប់ទៅរកភាពតានតឹងដូចសម័យសង្រ្គាមត្រជាក់វិញនោះទេ។ លោកបានថ្លែងដូចនេះមុនពេលកិច្ចប្រជុំតាមប្រព័ន្ធអនឡាញជាមួយប្រធានាធិបតីសហរដ្ឋអាមេរិក លោក ចូ បៃឌិន ដែលត្រូវបានគេរំពឹងថានឹងធ្វើឡើងក្នុងពេលឆាប់ៗនេះ។
លោក ស៊ី នៅក្នុងសារវីដេអូដែលបានថតទុកសម្រាប់វេទិកា CEO ដែលជាផ្នែកមួយនៃកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ដែលរៀបចំដោយប្រទេសនូវែលសេឡង់ បាននិយាយថា ការប៉ុនប៉ងដើម្បីគូសបន្ទាត់មនោគមវិជ្ជា ឬបង្កើតជាក្រុមតូចៗលើមូលដ្ឋានភូមិសាស្ត្រនយោបាយគឺត្រូវបរាជ័យ។
លោក ស៊ី បានបន្ដថា៖ “តំបន់អាស៊ី-ប៉ាស៊ីហ្វិកមិនអាចនិងមិនគួរវិលត្រឡប់ទៅរកការប្រឈមមុខគ្នា និងការបែកបាក់ដូចសម័យសង្រ្គាមត្រជាក់នោះទេ”។
ការថ្លែងសាររបស់មេដឹកនាំចិនដូចនេះគឺទំនងជាសំដៅលើកិច្ចខិតខំប្រឹងប្រែងរបស់សហរដ្ឋអាមេរិកក្នុងការចងសម្ព័ន្ធមិត្តនិងបង្កើតដៃគូក្នុងតំបន់ រួមទាំងក្រុម Quad ជាមួយប្រទេសឥណ្ឌា ជប៉ុន និងអូស្ត្រាលី ដើម្បីទប់ទល់ជាមួយនឹងការកើនឡើងនៃឥទ្ធិពលសេដ្ឋកិច្ចនិងយោធារបស់ចិន។
គួរបញ្ជាក់ផងដែរថា មេដឹកនាំប្រទេសមហាអំណាចពិភពលោកចិននិងសហរដ្ឋអាមេរិកគ្រោងរៀបចំកិច្ចប្រជុំមួយតាមប្រព័ន្ធអនឡាញនៅសប្ដាហ៍ក្រោយនេះ ប៉ុន្ដែកាលបរិច្ឆេទជាក់ស្ដែងពុំទាន់បានប្រកាសនៅឡើយទេ៕
