ក្រចេះ៖ ស្រ្តីជាប្រពន្ធបានស្លាប់បន្ទាប់ពីបញ្ជូនទៅសង្គ្រោះនៅមន្ទីរពេទ្យ ខណៈប្តីបានយកកាំបិតផ្គាក់កាប់លើប្រពន្ធឲ្យរងរបួសធ្ងន់ ដោយផ្តើមចេញពីការឈ្លោះប្រកែកគ្នាក្នុងគ្រួសារ។
លោកវរសេនីយ៍ទោ ណយ ស៊ីថាច អធិការរងទទួលការងារយុត្តិធម៌ នៃអធិការដ្ឋានគរបាលស្រុកសំបូរបានឲ្យដឹងថា៖ ករណីអំពើហិង្សាប្រព្រឹត្តដោយសហពន្ធ័នេះ បានកើតឡើងកាលពីយប់ថ្ងៃទី១៣ ខែវិច្ឆកា ឆ្នាំ ២០២១ នៅក្នុងភូមិវឌ្ឍនៈ ឃុំវឌ្ឍនៈ ស្រុកសំបូរ ខេត្តក្រចេះ ។ បង្កឡើងដោយជនសង្ស័យជាប្តីឈ្មោះ ជេម សុធា អាយុ ២៦ឆ្នាំ បានប្រើកាំបិតផ្គាក់កាប់ទៅលើជនរងគ្រោះជាប្រពន្ធឈ្មោះ បាន រដ្ឋាណា អាយុ ២៦ ឆ្នាំ អ្នកទាំងពីរមានទីលំនៅភូមិ ឃុំកើតហេតុខាងលើ។
លោកអធិការរងបានបន្តឲ្យដឹងថា៖ នៅវេលាកើតហេតុ ជនសង្ស័យជាប្តីបានឈ្លោះប្រកែកជាមួយជនរងគ្រោះជាប្រពន្ធ ពេលនោះជនសង្ស័យក៏បានយកកាំបិតផ្គាក់កាប់ទៅលេីប្រពន្ធចំនួន៨កាំបិត បណ្ដាលអោយរងរបួសធ្ងន់ គឺត្រូវចំក្បាល២កាំបិត ,ត្រូវចំថ្ពាល់ខាងឆ្វេង១កាំបិត ,ត្រូវចំបំពង់ករ១កាំបិត ,ត្រូវចំកែងដៃខាងស្ដាំ១កាំបិត ,ត្រូវចំខ្នង២កាំបិត ,ត្រូវចំស្មារខាងឆ្វេង១កាំបិត។
លោកអធិការរងបានបញ្ជាក់ថា ៖ ក្រោយពីជនសង្ស័យបានធ្វេីសកម្មភាពកាប់ទៅលេីប្រពន្ធរួច មក ជននេះបានយកកាំបិតកាប់ទៅលើខ្លួនឯងត្រូវចំភ្លៅទាំងសងខាង និងត្រូវពោះ២កន្លែង ហេីយព្យាយាមបំរុងចងករសម្លាប់ខ្លួន ទៀត ស្រាប់តែពេលនោះកម្លាំងប្រជាការពារភូមិបានជួយអត្តរាគមន៍ចូលទៅឃាត់ទាន់។
លោកថា ៖ ចំណែកជនរងគ្រោះត្រូវបានសាច់ញាតិ បញ្ចូនទៅព្យាបាលនៅមន្ទីពេទ្យបង្អែកខេត្តក្រចេះ ជាអកុសលពេលបញ្ចូនដល់មន្ទីរពេទ្យជនរងគ្រោះបានស្លាប់ និងបានតេស្តរកឃេីញ វិជ្ជមានកូវីដ១៩ទៀតផង។
គួរបញ្ជាក់ថា៖ បច្ចុប្បន្នជនសង្ស័យត្រូវបានសមត្ថកិច្ចធ្វើការឃាត់ខ្លួន នឹងយកទៅព្យាបាលនៅមន្ទីរពេទ្យបង្អែកស្រុកសំបូរ និងកសាងសំណុំរឿងបញ្ជូនទៅការិយាល័យជំនាញខេត្តដើម្បីចាត់ការបន្តតាមនិតិវិធី។
