កងកម្លាំងសន្តិសុខប៉ូឡូញបានប្រើប្រាស់កាណុងទឹកបាញ់លើក្រុមជនចំណាកស្រុក ដែលគប់ដុំថ្មដាក់ខ្លួននៅតាមព្រំដែនជាមួយប្រទេសបេឡារុស្សកាលពីថ្ងៃអង្គារ ខណៈអង្គការណាតូបានអះអាងឡើងវិញនូវការគាំទ្ររបស់ខ្លួនលើប៉ូឡូញ ដែលកំពុងជួបវិបត្តិជនអន្ដោប្រវេសន៍។
វីដេអូមួយដែលបានចេញផ្សាយដោយអាជ្ញាធរប៉ូឡូញបានបង្ហាញថា ជនចំណាកស្រុកក៏បាននាំគ្នាគប់ដបនិងដុំឈើតាមរបងព្រំដែនដែលមានលួសបន្លា ដើម្បីព្យាយាមបង្កើតច្រកឆ្លងចូល។
ប៉ូលីសចំនួនប្រាំពីរនាក់បានរងរបួសក្នុងអំពើហិង្សានេះ ដែលសហភាពអឺរ៉ុបបានចោទប្រកាន់បេឡារុសថាបានរៀបចំឡើង ដើម្បីសងសឹកលើការដាក់ទណ្ឌកម្មរបស់សហភាពអឺរ៉ុប ប៉ុន្ដែបេឡារុសបានច្រានចោលការចោទប្រកាន់នេះ។
ជនចំណាកស្រុកជាង៤ពាន់នាក់ ដែលភាគច្រើនមកពីប្រទេសអ៊ីរ៉ាក់និងអាហ្វហ្គានីស្ថានបច្ចុប្បន្នកំពុងរង់ចាំនៅឯព្រៃតាមបន្ទាត់ព្រំដែនដែលមានសីតុណ្ហភាពចុះត្រជាក់ខ្លាំង។ វាមិនត្រឹមតែជាព្រំដែនរបស់ប្រទេសប៉ូឡូញប៉ុណ្ណោះទេ ប៉ុន្តែវាក៏ជាព្រំដែនខាងក្រៅរបស់សហភាពអឺរ៉ុបនិងអង្គការណាតូ ដែលជាសម្ព័ន្ធមិត្តយោធាលោកខាងលិចផងដែរ។
អគ្គលេខាធិការអង្គការណាតូ លោក Jens Stoltenberg បានប្រាប់កិច្ចប្រជុំរដ្ឋមន្ត្រីការពារជាតិសម្ព័ន្ធមិត្តនៅទីក្រុងប្រ៊ុចសែលថា៖ “យើងមានការព្រួយបារម្ភយ៉ាងខ្លាំងចំពោះមេដឹកនាំបេឡារុស ដែលកំពុងប្រើប្រាស់ជនចំណាកស្រុកដែលងាយរងគ្រោះ ជាយុទ្ធសាស្ត្រកូនកាត់ប្រឆាំងនឹងប្រទេសដទៃទៀត”។
ចំណែកឯប្រទេសលីទុយអានី និងឡាតវី ដែលជាសមាជិកនៃអង្គការណាតូនិងសហភាពអឺរ៉ុប ក៏បានរាយការណ៍ពីការកើនឡើងយ៉ាងខ្លាំងនៃការប៉ុនប៉ងឆ្លងព្រំដែនពីប្រទេសបេឡារុសចាប់តាំងពីរដូវក្តៅផងដែរ។ មកទល់ពេលនេះ យ៉ាងហោចណាស់មានជនចំណាកស្រុក៨នាក់បានស្លាប់នៅព្រំដែនក្នុងអំឡុងពេលមានវិបត្តិជនចំណាកស្រុកនេះ៕
