អន្តរជាតិ៖នាយកសេវាសហព័ន្ធសម្រាប់កិច្ចសហប្រតិបត្តិការបច្ចេកទេសយោធា (FSMTC) លោក Dmitry Shugaev បានប្រាប់ទីភ្នាក់ងារ Sputnik នៅមុនពិធីតាំងពិពណ៌Airshowនាទីក្រុងឌូបៃថារុស្ស៊ីបានចាប់ផ្តើមបញ្ជូនប្រព័ន្ធកាំជ្រួចបាញ់ពីដីទៅអាកាសS-400 ទៅកាន់ប្រទេសឥណ្ឌា ហើយការដឹកជញ្ជូនកំពុងដំណើរការតាមការគ្រោងទុក។នេះបើយោងតាមការចុះរបស់ការសែតចិនGlobal Times នៅថ្ងៃទី១៧ខែវិច្ឆិកាឆ្នាំ២០២១។
លោកShugaevនិយាយថា៖«ការផ្គត់ផ្គង់ប្រព័ន្ធការពារដែនអាកាស S-400 ដល់ប្រទេសឥណ្ឌាបានចាប់ផ្តើមហើយនិងកំពុងដំណើរការទៅតាមកាលវិភាគ»។
សូមជម្រាបថាខែលការពារអាកាសS-400នេះត្រូវបានគេដាក់ពង្រាយនៅក្នុងប្រទេសចិន និងតួកគីរួចហើយ។រុស្ស៊ីនិងឥណ្ឌាបានចុះហត្ថលេខាលើកិច្ចព្រមព្រៀងទិញលក់ប្រព័ន្ធការពារអាកាស S-400s ក្នុងខែតុលាឆ្នាំ២០១៨។
កាលពីខែសីហា,ប្រធានក្រុមហ៊ុននាំចេញអាវុធរដ្ឋ Rosoboronexport លោក Alexander Mikheev បានប្រាប់ការសែតរុស្ស៊ី Sputnik ថាការចរចាស្តីពីការផ្គត់ផ្គង់ប្រព័ន្ធការពារដែនអាកាសS-400កំពុងដំណើរការជាមួយប្រទេសចំនួនប្រាំពីរផ្សេងទៀតនៅក្នុងតំបន់មជ្ឈិមបូព៌ា អាស៊ីប៉ាស៊ីហ្វិកនិងអាហ្វ្រិក៕
