ចិនកំពុងជួបជាមួយមេដឹកនាំមកពីសមាគមប្រជាជាតិអាស៊ីអាគ្នេយ៍ (អាស៊ាន) សម្រាប់កិច្ចប្រជុំកំពូលប្រចាំឆ្នាំ ចំពេលមានរបាយការណ៍ថា រដ្ឋជាសមាជិកបានបដិសេធសំណើរបស់ទីក្រុងប៉េកាំងក្នុងការដាក់បញ្ចូលមេទ័ពកំពូលរបស់មីយ៉ាន់ម៉ាឱ្យចូលរួមក្នុងកិច្ចប្រជុំនេះ។
យោងតាមការចេញផ្សាយរបស់ទីភ្នាក់ងារសារព័ត៌មាន Reuters កិច្ចប្រជុំកំពូលតាមប្រព័ន្ធអនឡាញ ដែលរៀបចំដោយប្រធានាធិបតីចិន លោក ស៊ី ជីនពីង បានចាប់ផ្តើមកាលពីថ្ងៃចន្ទ ដោយគ្មានតំណាងមកពីប្រទេសមីយ៉ាន់ម៉ាឡើយ។
នេះជាលើកទីពីរក្នុងរយៈពេលមួយខែ ដែលអាស៊ានបានដកវត្តមានអគ្គមេបញ្ជាការមីយ៉ាន់ម៉ា លោក Min Aung Hlaing ចេញពីកិច្ចប្រជុំកំពូលក្នុងតំបន់។
លោកឧត្តមសេនីយរូបនេះបានផ្ដួលរំលំរដ្ឋាភិបាលជាប់ឆ្នោតនៃគណបក្សសម្ព័ន្ធជាតិដើម្បីប្រជាធិបតេយ្យ (NLD) កាលពីថ្ងៃទី១ ខែកុម្ភៈកន្លងទៅ ហើយបានធ្វើការបង្ក្រាបលើក្រុមបាតុករអហិង្សា ដែលបានធ្វើឱ្យប្រទេសមីយ៉ាន់ម៉ាធ្លាក់ចូលក្នុងស្ថានភាពវ៉ឹកវរ។
សមាជិកអាស៊ានទាំង១០ប្រទេសបានដឹកនាំកិច្ចខិតខំប្រឹងប្រែងការទូត ដើម្បីបញ្ចប់វិបត្តិ ដោយបានយល់ព្រមលើកិច្ចព្រមព្រៀងកាលពីខែមេសាជាមួយលោក Min Aung Hlaing ដែលបានអះអាងថា លោកនឹងរៀបចំកិច្ចសន្ទនាជាមួយលោកស្រី Aung San Suu Kyi ប៉ុន្ដែក្រោយមក លោកមិនបានធ្វើតាមកិច្ចព្រមព្រៀងនេះឡើយ ហើយអាស៊ានបានសងសឹកដោយរារាំងមិនឱ្យលោក Min Aung Hlaing ចូលរួមកិច្ចប្រជុំកំពូលរបស់ខ្លួន។
គួរបញ្ជាក់ផងដែរថា ការសម្រេចចិត្តនេះគឺមិនធ្លាប់មានពីមុនមកទេសម្រាប់ក្រុមប្រទេស ដែលសង្កត់ធ្ងន់លើគោលការណ៍មិនជ្រៀតជ្រែកចូលកិច្ចការផ្ទៃក្នុង៕
