បក្សប្រឆាំងអូស្ត្រាលីនិយាយថា រដ្ឋាភិបាលកំពុងលេងល្បែងដ៏គ្រោះថ្នាក់ជុំវិញបញ្ហាកោះតៃវ៉ាន់

អ្នកនាំពាក្យមកពីគណបក្សប្រឆាំងបាននិយាយកាលពីថ្ងៃអង្គារថា រដ្ឋាភិបាលរបស់នាយករដ្ឋមន្ត្រីអូស្ត្រាលីលោក Scott Morrison កំពុងដាក់ពង្រាយយុទ្ធសាស្ត្របោះឆ្នោតដ៏គ្រោះថ្នាក់ ជាមួយនឹងការបញ្ចេញមតិរបស់ខ្លួនអំពីការចូលរួមជាមួយសហរដ្ឋអាមេរិកនៅក្នុងសង្គ្រាមណាមួយលើកោះតៃវ៉ាន់។

រដ្ឋមន្ត្រីក្រសួងការពារជាតិអូស្ត្រាលី លោក Peter Dutton កាលពីដើមខែនេះ បាននិយាយថា ទីក្រុងកង់បេរ៉ានឹងចូលរួមជាមួយសហរដ្ឋអាមេរិកក្នុងសកម្មភាពយោធា ប្រសិនបើចិនវាយប្រហារលើកោះតៃវ៉ាន់ ដែលទីក្រុងប៉េកាំង ចាត់ទុកថាជាខេត្តរបស់ខ្លួន។

លោកស្រី Penny Wong អ្នកនាំពាក្យផ្នែកកិច្ចការបរទេសរបស់គណបក្សប្រឆាំងបាននិយាយថា ការអត្ថាធិប្បាយរបស់លោក Dutton គឺជាផ្នែកមួយនៃយុទ្ធសាស្ត្ររបស់រដ្ឋាភិបាលសម្រាប់ការបោះឆ្នោត ដែលត្រូវតែកើតឡើងមុនខែឧសភា ឆ្នាំ២០២២។

លោកស្រីបានថ្លែងសុន្ទរកថាមួយទៅឯសាកលវិទ្យាល័យជាតិអូស្ត្រាលីថា៖ “ការបង្កើនលទ្ធភាពនៃសង្រ្គាមជាមួយនឹងប្រទេសមហាអំណាចគឺជាយុទ្ធសាស្ត្របោះឆ្នោតដ៏គ្រោះថ្នាក់បំផុតនៅក្នុងប្រវត្តិសាស្ត្រអូស្ត្រាលី ដែលជាកលល្បិចប្រើប្រាស់ដោយអ្នកនយោបាយ ដែលគ្មានការទទួលខុសត្រូវ និងកំពុងតែធ្វើគ្រប់យ៉ាងដើម្បីបន្ដអំណាច”។

លោកស្រី Wong បានបញ្ជាក់ថា រដ្ឋាភិបាលរបស់លោក Morrison ក្នុងប៉ុន្មានសប្តាហ៍ថ្មីៗនេះ បានព្យាយាមធ្វើឱ្យគណបក្សប្រឆាំងមើលទៅដូចជាអ្នកគាំទ្រប្រទេសចិន។

ទំនាក់ទំនងជាមួយប្រទេសចិនមានភាពរង្គោះរង្គើរួចទៅហើយ បន្ទាប់ពីប្រទេសអូស្ត្រាលីបានហាមឃាត់ក្រុមហ៊ុនចិន Huawei ពីការពង្រីកបណ្តាញអ៊ីនធឺណេត 5G កាលពីឆ្នាំ២០១៨ និងកាន់តែល្អក់កករបន្ថែមទៀតនៅឆ្នាំ២០២០ នៅពេលដែលអូស្ដ្រាលីបានអំពាវនាវឱ្យមានការស៊ើបអង្កេតឯករាជ្យលើប្រភពដើមនៃមេរោគកូវីដ-១៩ ដែលករណីឆ្លងដំបូងបានរាយការណ៍នៅឯប្រទេសចិន៕

លោកស្រី Wong បានសង្កត់ធ្ងន់ថា កោះតៃវ៉ាន់គឺជាហានិភ័យដ៏ធំបំផុតចំពោះស្ថិរភាពនៅក្នុងតំបន់ឥណ្ឌូប៉ាស៊ីហ្វិក  ហើយជម្លោះណាមួយនៅទីនោះនឹងជាក្លាយជាមហន្តរាយសម្រាប់មនុស្សជាតិ៕