ប្រទេសនូវែលសេឡង់បានបង្ហាញផែនការរបស់ខ្លួនក្នុងការបើកព្រំដែនឡើងវិញ ហើយនឹងអនុញ្ញាតឱ្យភ្ញៀវបរទេសចូលប្រទេសនៅឆ្នាំក្រោយ។ អ្នកទេសចរដែលបានចាក់វ៉ាក់សាំងពេញលេញ អាចចូលប្រទេសបានចាប់ពីថ្ងៃទី៣០ ខែមេសាតទៅ ហើយពួកគេចាំបាច់ត្រូវនៅដាច់ដោយឡែករយៈពេលប្រាំពីរថ្ងៃ នៅពេលមកដល់។
ប្រជាជននូវែលសេឡង់ដែលនៅក្រៅស្រុកក៏នឹងត្រូវបានអនុញ្ញាតឱ្យធ្វើដំណើរទៅផ្ទះវិញ ចាប់ពីដើមឆ្នាំក្រោយផងដែរ ក្រោមច្បាប់ស្រដៀងគ្នានេះ។ ការប្រកាសនេះបានបន្ធូរបន្ថយលើវិធានការចាស់ៗ ដែលបានបិទមិនឲ្យពលរដ្ឋ និងអ្នកទេសចរជាច្រើននាក់ធ្វើដំណើរចូលប្រទេស ចាប់តាំងពីព្រំដែនត្រូវបានបិទដើម្បីទប់ស្កាត់ការនាំចូលមេរោគកូវីដ-១៩។
រដ្ឋមន្ត្រីទទួលបន្ទុកឆ្លើយតបមេរោគកូវីដ-១៩ លោក Chris Hipkins បានគូសបញ្ជាក់ពីផែនការបើកដំណើរការឡើងវិញជាដំណាក់កាលកាលពីថ្ងៃចន្ទ ដោយហៅវាថាជាវិធីសាស្រ្តដែលមានសុវត្ថិភាពបំផុត ដើម្បីធានាថាហានិភ័យត្រូវបានគ្រប់គ្រងដោយប្រុងប្រយ័ត្ន។
នៅក្នុងដំណាក់កាលដំបូងនៃការបើកឡើងវិញ ប្រជាពលរដ្ឋនូវែលសេឡង់ និងអ្នកស្នាក់នៅជាអចិន្ដ្រៃយ៍នៅអូស្ដ្រាលីនឹងត្រូវបានអនុញ្ញាតឱ្យត្រលប់មកវិញចាប់ពីថ្ងៃទី១៦ ខែមករាតទៅ។ ប្រជាជននូវែលសេឡង់ដែលស្ថិតនៅក្នុងប្រទេសផ្សេងទៀតទាំងអស់នឹងត្រូវបានអនុញ្ញាតឱ្យចូលចាប់ពីថ្ងៃទី១៣ ខែកុម្ភៈ។
ចំណែកឯក្រុមអ្នកដំណើរបរទេសនឹងត្រូវបានអនុញ្ញាតឱ្យចូលក្នុងប្រទេសចាប់ពីថ្ងៃទី៣០ ខែមេសា។ អ្នកធ្វើដំណើរទាំងអស់ត្រូវតែចាក់វ៉ាក់សាំងពេញលេញ នឹងត្រូវដាក់ឱ្យនៅដាច់ដោយឡែករយៈពេលប្រាំពីរថ្ងៃ ហើយនឹងត្រូវធ្វើតេស្តរកកូវីដ នៅពេលមកដល់។
លោក Hipkins បានមានប្រសាសន៍ថា៖ “វិធីសាស្រ្តជាដំណាក់កាលនេះកាត់បន្ថយផលប៉ះពាល់ ដែលអាចកើតមានលើសហគមន៍ដែលងាយរងគ្រោះ និងប្រព័ន្ធសុខភាពរបស់នូវែលសេឡង់”៕
