អង្គការសុខភាពពិភពលោក (WHO) បានព្រមានថា មនុស្ស៧០០,០០០នាក់ទៀតនៅអឺរ៉ុបនិងផ្នែកខ្លះនៃអាស៊ីអាចស្លាប់ដោយសារមេរោគកូវីដ-១៩នៅត្រឹមខែមីនាខាងមុខ។ មកទល់ពេលនេះ តំបន់អឺរ៉ុបដែលមានប្រទេសជាង ៥៣ បានរាយការណ៍ថា មានអ្នកស្លាប់លើសពី ១.៥ លាននាក់។
អង្គការ WHO បានព្រមានអំពី “ភាពតានតឹងខ្ពស់ ឬខ្លាំងបំផុត” នៅតាមបណ្ដាមណ្ឌលថែទាំសុខភាព និងមន្ទីរពេទ្យនានាក្នុងប្រទេសចំនួន ៤៩ នៅត្រឹមខែមីនា ឆ្នាំ២០២០។ អឺរ៉ុបកំពុងប្រឈមមុខនឹងការកើនឡើងនៃករណីឆ្លង ដែលបានជំរុញឱ្យប្រទេសអូទ្រីសត្រឡប់ទៅរកវិធានការបិទខ្ទប់សាជាថ្មី ខណៈប្រទេសមួយចំនួនទៀតក៏កំពុងពិចារណាលើវិធានការទប់ស្កាត់ថ្មីផងដែរ។
ប្រទេសមួយចំនួន រួមមានបារាំង អាល្លឺម៉ង់ និងក្រិច ក៏ទំនងជាកំណត់ឱ្យប្រជាពលរដ្ឋខ្លួនចាក់វ៉ាក់សាំងដូសជំរុញជាកំហិផងដែរ ប៉ុន្តែប្រទេសខ្លះបានផ្ទុះការតវ៉ាយ៉ាងខ្លាំងប្រឆាំងនឹងវិធានការនេះ។ ពលរដ្ឋនៅប្រទេសហុល្លង់បានធ្វើកុបកម្មជាច្រើនយប់ ដោយសារតែមិនពេញចិត្តនឹងវិធានការបិទខ្ទប់។
តាមរយៈការវាយតម្លៃរបស់អង្គការ WHO មេរោគកូវីដ-១៩គឺជាមូលហេតុចម្បងនៃការស្លាប់នៅក្នុងតំបន់អឺរ៉ុប។អង្គការ WHO បានឱ្យដឹងកាលពីថ្ងៃអង្គារថា៖ “អត្រាអ្នកស្លាប់ ដែលបាននិងកំពុងរាយការណ៍ជាបន្ដបន្ទាប់ អាចទំនងជាកើនដល់ជាង ២.២ លាននាក់នៅឆ្នាំក្រោយ បើផ្អែកលើនិន្នាការបច្ចុប្បន្ន”។
ថ្មីៗនេះ ការស្លាប់ដែលទាក់ទងនឹងមេរោគកូវីដ-១៩បានកើនឡើងទ្វេដងដល់ជិត ៤,២០០ នាក់ក្នុងមួយថ្ងៃ។ បើគិតតែនៅក្នុងប្រទេសរុស្ស៊ីតែមួយ ចំនួនអ្នកស្លាប់ប្រចាំថ្ងៃមានរហូតដល់ ១,២០០ នាក់។
លោកវេជ្ជបណ្ឌិត Hans Kluge នាយកអង្គការ WHO ប្រចាំទ្វីបអឺរ៉ុបបានជំរុញឱ្យអ្នកដែលមិនទាន់បានចាក់វ៉ាក់សាំង ឱ្យប្រញាប់ទៅទទួលវ៉ាក់សាំង។ លោកបានមានប្រសាសន៍ថា៖ “យើងទាំងអស់គ្នាមានឱកាសនិងទំនួលខុសត្រូវក្នុងការជួយបញ្ចៀសសោកនាដកម្ម និងការបាត់បង់ជីវិត ក៏ដូចជាជួយបញ្ចៀសការរំខាននានាលើសង្គមនិងអាជីវកម្មក្នុងអំឡុងរដូវរងានេះ”៕
