អន្តរជាតិ៖ប្រមុខសហភាពអឺរ៉ុបបានប្រកាសនៅលើប្រព័ន្ធផ្សព្វផ្សាយសង្គមនៅថ្ងៃទី២៤ខែវិច្ឆិកានេះថាប្រធានក្រុមប្រឹក្សាអឺរ៉ុប លោក Charles Michel និងប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃពុធបានពិភាក្សាគ្នាអំពីស្ថានភាពនៅក្នុងប្រទេសបេឡារុស្ស និងអ៊ុយក្រែន នៅក្នុងការសន្ទនាតាមទូរស័ព្ទ។
លោកMichelបានប្រាប់លោកពូទីនថា សហភាពអឺរ៉ុបកំពុងតាមដានការបង្កើនវត្តមានយោធារុស្ស៊ីនៅតាមព្រំដែនរបស់ខ្លួនជាមួយអ៊ុយក្រែន។
ដោយប្រកាសព័ត៌មានលម្អិតនៃការសន្ទនានៅលើ Twitter, លោក Michel បានគូសបញ្ជាក់ថា«ការបន្ថយភាពតានតឹងនិងស្ថេរភាពគឺជាការចាំបាច់បំផុត»។
លោកបានបន្ថែមថាលោកក៏បានរំឭកលោកពូទីនផងដែរអំពីការទទួលខុសត្រូវរបស់រុស្ស៊ីក្នុងការរំលោភលើដំណោះស្រាយដោយសន្តិវិធីនៅភាគខាងកើតប្រទេសអ៊ុយក្រែន។
ទន្ទឹមគ្នានេះវិមានក្រឹមឡាំងបាននិយាយនៅក្នុងសេចក្តីថ្លែងការណ៍មួយថាភាគីទាំងពីរបានសង្កត់ធ្ងន់លើសារៈសំខាន់នៃការដោះស្រាយវិបត្តិការធ្វើចំណាកស្រុកដោយអនុលោមតាមបទដ្ឋាននៃច្បាប់មនុស្សធម៌អន្តរជាតិ។
លោក ពូទីន បាននិយាយថា ចេតនារបស់សហភាពអឺរ៉ុបក្នុងការដាក់ទណ្ឌកម្មថ្មីប្រឆាំងនឹងបេឡារុស្សនឹងបង្ហាញឱ្យឃើញនូវផលអវិជ្ជមាន,នេះបើយោងតាមវិមានក្រឹមឡាំង។មេដឹកនាំរុស្ស៊ីបានលើកឡើងអំពីការប្រើប្រាស់ឧស្ម័នបង្ហូរទឹកភ្នែក គ្រាប់បែកដៃ កាណុងបាញ់ទឹក និងឧបករណ៍ផ្សេងទៀតដោយកងកម្លាំងសន្តិសុខប៉ូឡូញ ហើយបានសម្តែងក្តីសង្ឃឹមថានឹងមិនមានអំពើហិង្សាកើតឡើងជាថ្មីម្ដងទៀតលើជនចំណាកស្រុកដើម្បីជៀសវាងការឡើងកំដៅនៅតាមបន្ទាត់ព្រំដែន៕
