ហ្វីលីពីនច្រានចោលការទាមទាររបស់ចិនឱ្យដកកប៉ាល់ដែលខ្លួនទុកចោលចេញលើដែនទឹក

ប្រមុខការពារជាតិរបស់ហ្វីលីពីនបាននិយាយកាលពីថ្ងៃព្រហស្បតិ៍ថា ហ្វីលីពីននឹងមិនដកកប៉ាល់ដែលមានសភាពទ្រុឌទ្រោមនិងកំពុងដាក់ចោលនៅសមុទ្រចិនខាងត្បូងនោះទេ ហើយបានច្រានចោលការទាមទាររបស់ប្រទេសចិន បន្ទាប់ពីបានរារាំងបេសកកម្មដើម្បីផ្គត់ផ្គង់ស្បៀងនិងសម្ភារដល់នាវិក។

រដ្ឋមន្ត្រីក្រសួងការពារជាតិលោក Delfin Lorenzana បានច្រានចោលការអះអាងរបស់ប្រទេសចិនកាលពីថ្ងៃពុធដែលថាហ្វីលីពីនបានប្តេជ្ញាដកកប៉ាល់ BRP Sierra Madre ដែលត្រូវបានសំចតចោលនៅឯតំបន់ Second Thomas តាំងពីឆ្នាំ១៩៩៩មកម្ល៉េះ ដើម្បីពង្រឹងការទាមទារអធិបតេយ្យភាពរបស់ទីក្រុងម៉ានីលនៅក្នុងប្រជុំកោះ Spratly ។

កប៉ាល់ BRP Sierra Madre មានប្រវែង ១០០ ម៉ែត្រ ហើយត្រូវបានសាងសង់សម្រាប់កងទ័ពជើងទឹកសហរដ្ឋអាមេរិកក្នុងអំឡុងសង្គ្រាមលោកលើកទីពីរ។

លោក Lorenzana បានប្រាប់អ្នកយកព័ត៌មានថា៖ “កប៉ាល់នោះបាននៅទីនោះតាំងពីឆ្នាំ១៩៩៩។ ប្រសិនបើមានការប្តេជ្ញាចិត្តពិតមែន វាប្រហែលជាត្រូវបានគេយកចេញជាយូរមកហើយ”។

អ្នកនាំពាក្យក្រសួងការបរទេសចិន លោក Zhao Lijian កាលពីថ្ងៃពុធ បាននិយាយថា ទីក្រុងប៉េកាំងទាមទារឱ្យភាគីហ្វីលីពីនគោរពការប្តេជ្ញាចិត្តរបស់ខ្លួន និងដកកប៉ាល់ដែលចូលចតខុសច្បាប់របស់ខ្លួន”។

តំបន់ទឹករាក់ Second Thomas មានចម្ងាយប្រហែល ១៩៥ គីឡូម៉ែត្រពីកោះ Palawan របស់ប្រទេសហ្វីលីពីន ហើយកប៉ាល់ BRP Sierra Madre ដែលស្ថិតនៅតំបន់នេះជាកន្លែងស្នាក់នៅបណ្ដោះអាសន្នរបស់ទាហានមួយក្រុមតូច។

លោក Lorenzana បានចោទប្រកាន់ប្រទេសចិនថា “រំលោភបំពាន” នៅពេលដែលឆ្មាំសមុទ្ររបស់ចិនបានរំខានបេសកកម្មផ្គត់ផ្គង់ស្បៀងនិងសម្ភារឱ្យកងទ័ពឡើងវិញ៕