អន្តរជាតិ៖សមាជិកសភាអាមេរិកមួយក្រុមបានមកដល់កោះតៃវ៉ាន់តាមយន្តហោះយោធាអាមេរិក ដែលជាដំណើរទស្សនកិច្ចលើកទីបីរបស់ពួកគេនៅឆ្នាំនេះ។
សមាជិកសភាអាមេរិក៥រូបមកពីគណបក្សទាំងពីររួមទាំងលោក Mark Takano ផងដែរបានធ្វើដំណើរពីប្រទេសកូរ៉េខាងត្បូងទៅកាន់ទីក្រុងតៃប៉ិកាលពីថ្ងៃព្រហស្បតិ៍។
បើតាមក្រសួងការបរទេសរបស់តៃវ៉ាន់, ក្រុមគណៈប្រតិភូអាមេរិកនឹងជួបជាមួយមន្ត្រីដើម្បីពិភាក្សាអំពីទំនាក់ទំនងទ្វេភាគី សន្តិសុខក្នុងតំបន់ និងបញ្ហាផ្សេងៗទៀតក្នុងអំឡុងពេលស្នាក់នៅរយៈពេលពីរថ្ងៃរបស់ពួកគេ។
ទីភ្នាក់ងារព័ត៌មានកណ្តាលរបស់កោះតៃវ៉ាន់និយាយថា ក្រុមនេះក៏នឹងជួបពិភាក្សាជាមួយប្រធានាធិបតី Tsai Ing-wen ផងដែរ។សូមរំលឹកដែរថាគណៈប្រតិភូសភាអាមេរិកមួយរូបក៏បានធ្វើទស្សនកិច្ចស្រដៀងគ្នានេះនៅកោះតៃវ៉ាន់ចាប់ពីថ្ងៃទី ៩ ដល់ថ្ងៃទី ១១ ខែវិច្ឆិកា។ការិយាល័យប្រធានាធិបតីនិងក្រសួងការបរទេសរបស់តៃវ៉ាន់បាននិយាយថាដំណើរទស្សនកិច្ចជាបន្តបន្ទាប់របស់សមាជិកសភាអាមេរិកនៃគណបក្សទាំងពីរនេះបានបង្ហាញថា ពួកគេមានការព្រមព្រៀងគ្នាដើម្បីគាំទ្រយ៉ាងពេញទំហឹងនូវទំនាក់ទំនងកាន់តែរឹងមាំជាមួយតៃវ៉ាន់។
ដោយឡែកភាគីចិនដែលតែងតែអះអាងថាតៃវ៉ាន់ជាផ្នែកមួយនៃទឹកដីរបស់ខ្លួននោះបានចេញមុខប្រឆាំងយ៉ាងដាច់អហង្ការចំពោះទំនាក់ទំនងនយោបាយរវាងសហរដ្ឋអាមេរិក -តៃវ៉ាន់និងការប្រើប្រាស់អាកាសយានដ្ឋានតៃវ៉ាន់ដោយយន្តហោះយោធាអាមេរិកជាញឹកញាប់នេះ៕
