ចក្រភពអង់គ្លេសដាក់ប្រទេសចំនួន៦នៅតំបន់អាហ្វ្រិកក្នុងបញ្ជីក្រហម ដោយសារមេរោគកូវីដប្រភេទថ្មី

លោក Sajid Javid រដ្ឋមន្ត្រីសុខាភិបាលចក្រភពអង់គ្លេសបានមានប្រសាសន៍កាលពីថ្ងៃព្រហស្បតិ៍ថា ប្រទេសអង់គ្លេសបានណែនាំលក្ខខណ្ឌធ្វើដំណើរថ្មីដ៏តឹងរ៉ឹងសម្រាប់ប្រទេសចំនួនប្រាំមួយក្នុងទ្វីបអាហ្រ្វិក រួមទាំងអាហ្រ្វិកខាងត្បូងផងដែរ ដោយសារតែមានការព្រួយបារម្ភកាន់តែខ្លាំងឡើងលើមេរោគកូវីដ-១៩ប្រភេទបំប្លែងខ្លួនថ្មី ដែលទើបរកឃើញ។

លោករដ្ឋមន្ត្រីសុខាភិបាលបានប្រកាសថា ចាប់ពីពេលរសៀលនៅថ្ងៃសុក្រនេះ អាហ្រ្វិកខាងត្បូង ណាមីប៊ី ហ្ស៊ីមបាវ៉េ បូតស្វាណា ឡេសូថូ និងអេសវ៉ាទីនី នឹងត្រូវបានបញ្ចូលទៅក្នុងបញ្ជីក្រហមនៃការធ្វើដំណើររបស់ប្រទេសអង់គ្លេស។

ជនជាតិអង់គ្លេសនិងអៀរឡង់ ដែលធ្វើដំណើរមកពីប្រទេសទាំងនេះចាំបាច់ត្រូវធ្វើចត្តាឡីស័ក ហើយពលរដ្ឋដែលមកពីបណ្ដាប្រទេសទាំងនេះពុំត្រូវបានអនុញ្ញាតឱ្យចូលចក្រភពអង់គ្លេសឡើយ។ ការហោះហើរត្រង់នឹងត្រូវហាមឃាត់ជាបណ្តោះអាសន្ន រហូតដល់កន្លែងដាក់ឱ្យនៅដាច់ដោយឡែកត្រូវបានបង្កើតឡើង។

លោក Javid បាននិយាយថា៖ “ទិន្នន័យបន្ថែមទៀតកំពុងត្រូវការ ប៉ុន្តែយើងកំពុងធ្វើការយ៉ាងប្រុងប្រយ័ត្នឥឡូវនេះ ហើយទីភ្នាក់ងារសន្តិសុខសុខភាពរបស់ចក្រភពអង់គ្លេស (UKHSA) ក៏កំពុងស៊ើបអង្កេតលើវ៉ារ្យ៉ង់ថ្មីផងដែរ”។

រហូតមកដល់ពេលនេះ ៥៩ ករណីនៃវ៉ារ្យ៉ង់ថ្មីប្រភេទ B.1.1.529 ត្រូវបានរកឃើញនៅអាហ្វ្រិកខាងត្បូង ហុងកុង និងបូតស្វាណា។ ករណីភាគច្រើនគឺនៅអាហ្រ្វិកខាងត្បូង ហើយមានការព្រួយបារម្ភថា វ៉ារ្យ៉ង់ប្រភេទថ្មីអាចមានកម្រិតចម្លងខ្ពស់ជាងវ៉ារ្យ៉ង់ប្រភេទមុនទៅទៀត៕