ប្រមុខដឹកនាំអង់គ្លេសអំពាវនាវឱ្យបារាំងយល់ព្រមទទួលយកជនចំណាកស្រុកទៅវិញ

នាយករដ្ឋមន្រ្តីចក្រភពអង់គ្លេស លោក Boris Johnson បានអំពាវនាវឱ្យប្រធានាធិបតីបារាំង លោក Emmanuel Macron យល់ព្រមទទួលយកជនចំណាកស្រុក ដែលបានឆ្លងកាត់តាមព្រែកសមុទ្រចូលចក្រភពអង់គ្លេស ត្រលប់ទៅប្រទេសបារាំងវិញ។

តាមរយៈលិខិតមួយដែលប្រមុខដឹកនាំចក្រភពអង់គ្លេសផ្ញើជូនប្រធានាធិបតីបារាំង លោកបានកំណត់ជំហានចំនួនប្រាំ ដើម្បីធ្វើសកម្មភាពបានទូលំទូលាយនិងលឿនជាងមុន ក្នុងគោលបំណងបញ្ចៀសការកើតឡើងម្តងទៀតនៃសោកនាដកម្មលង់ទឹកកាលពីថ្ងៃពុធ ដែលបានផ្ដាច់ជីវិតមនុស្សអស់ ២៧ នាក់។

មន្ត្រីរដ្ឋាភិបាលចក្រភពអង់គ្លេសគ្រោងនឹងចូលរួមកិច្ចពិភាក្សានៅទីក្រុង Calais នៅពេលក្រោយ ហើយរដ្ឋមន្ត្រីក្រសួងមហាផ្ទៃអង់គ្លេសលោកស្រី Priti Patel នឹងជួបសមភាគីបារាំងនៅចុងសប្តាហ៍នេះ ដើម្បីពិភាក្សាអំពីកិច្ចសហប្រតិបត្តិការនាពេលអនាគត។

នៅក្នុងលិខិតផ្ញើទៅកាន់លោក Macron លោកនាយករដ្ឋមន្ត្រី Johnson បានគូសបញ្ជាក់ពីជំហានចំនួន ៥ ដែលលោកចង់ឃើញរួមមាន៖

១. ការល្បាតរួមគ្នាដើម្បីទប់ស្កាត់ទូកមិនឱ្យចាកចេញពីឆ្នេរបារាំង

២. ការដាក់ពង្រាយបច្ចេកវិទ្យាទំនើប ដូចជាឧបករណ៍ចាប់សញ្ញា និងប្រព័ន្ធរ៉ាដា

៣. ការល្បាតដែនសមុទ្រទៅវិញទៅមកនៅក្នុងដែនទឹកទាំងពីរប្រទេស និងការឃ្លាំមើលតាមអាកាស

៤. ការពង្រឹងការងាររបស់ផ្នែកស៊ើបការណ៍រួមរបស់ប្រទេស

៥. ការបំពេញការងារជាបន្ទាន់លើកិច្ចព្រមព្រៀងត្រឡប់ទៅវិញទ្វេភាគីជាមួយបារាំង រួមជាមួយនឹងការពិភាក្សាដើម្បីបង្កើតកិច្ចព្រមព្រៀងត្រឡប់ទៅវិញរបស់ចក្រភពអង់គ្លេស-សហភាពអឺរ៉ុប។

លោក Johnson បានមានប្រសាសន៍ថា៖ “កិច្ចព្រមព្រៀងជាមួយប្រទេសបារាំងដើម្បីទទួលយកវិញនូវជនចំណាកស្រុក ដែលឆ្លងកាត់តាមព្រែកសមុទ្រ ដែលជាផ្លូវដ៏គ្រោះថ្នាក់នេះ នឹងមានឥទ្ធិពលភ្លាមៗ”៕