ជប៉ុននឹងហាមឃាត់មិនឱ្យភ្ញៀវបរទេសចូល ដើម្បីការពារមេរោគបំប្លែងខ្លួនថ្មីអូមីក្រុង

មេដឹកនាំជប៉ុនបាននិយាយកាលពីថ្ងៃចន្ទថា ខ្លួននឹងរារាំងការធ្វើដំណើរចូលរបស់ជនបរទេសដើម្បីការពារការរីករាលដាលនៃមេរោគកូវីដ-១៩បំប្លែងខ្លួនថ្មីប្រភេទអូមីក្រុង ដោយប្រកាសចូលរួមជាមួយអ៊ីស្រាអែលក្នុងការអនុវត្តវិធានការដ៏តឹងរឹងបំផុត។

នាយករដ្ឋមន្ត្រីជប៉ុនលោក Fumio Kishida បានប្រាប់អ្នកយកព័ត៌មានថា៖ “ដើម្បីជៀសវាងសេណារីយ៉ូដ៏អាក្រក់បំផុតនិងជាវិធានការប្រុងប្រយ័ត្នជាបន្ទាន់ ប្រទេសជប៉ុននឹងហាមឃាត់រាល់ការធ្វើដំណើរចូលរបស់ជនបរទេសចាប់ពីពាក់កណ្តាលអធ្រាត្រនៅថ្ងៃទី៣០ ខែវិច្ឆិកាតទៅ”។

លោកបានបន្ថែមថា ជនជាតិជប៉ុនដែលត្រឡប់មកពីប្រទេសជាក់លាក់មួយចំនួននឹងត្រូវដាក់ឱ្យនៅដាច់ពីគេក្នុងកន្លែងដែលបានកំណត់។

វិធានការថ្មីនេះត្រូវបានធ្វើឡើងយ៉ាងឆាប់រហ័សបើគិតពីថ្ងៃសុក្រសប្ដាហ៍មុន នៅពេលដែលប្រទេសជប៉ុនបាននិយាយថា ខ្លួននឹងរឹតបន្តឹងការគ្រប់គ្រងព្រំដែនលើប្រជាជនដែលមកពីប្រទេសចំនួនប្រាំមួយនៅទ្វីបអាហ្វ្រិក។

ការរឹតបន្ដឹងនេះត្រូវបានធ្វើឡើងសាជាថ្មី បន្ទាប់ពីមេដឹកនាំជប៉ុនទើបតែបន្ធូរបន្ថយវិធានការដាក់ឱ្យនៅដាច់ពីគេលើអ្នកធ្វើដំណើរអាជីវកម្មបរទេសដើម្បីជួយជំរុញសេដ្ឋកិច្ចកាលពីប៉ុន្មានសប្តាហ៍មុននេះ។

រហូតមកដល់ពេលនេះ ប្រទេសជប៉ុនមិនទាន់រកឃើញវ៉ារ្យ៉ង់អូមីក្រុងនៅឡើយទេ។ រដ្ឋមន្ត្រីក្រសួងសុខាភិបាលជប៉ុន លោក Shigeyuki Goto បានថ្លែងក្នុងសន្និសីទសារព័ត៌មានដាច់ដោយឡែកមួយថា អ្នកធ្វើដំណើរម្នាក់មកពីប្រទេសណាមីប៊ីត្រូវបានគេរកឃើញថាមានផ្ទុកមេរោគកូវីដ ហើយកំពុងតែធ្វើតេស្តបន្ថែមដើម្បីពិនិត្យថាតើវាជាប្រភេទវ៉ារ្យ៉ង់ថ្មីដែរឬយ៉ាងណា។

គួរបញ្ជាក់ផងដែរថា បណ្ដាប្រទេសនៅជុំវិញពិភពលោកបានអនុវត្តការទប់ស្កាត់នៅតាមព្រំដែនក្នុងកម្រិតផ្សេងៗគ្នាចាប់តាំងពីអង្គការ WHO បានសម្ដែងការព្រួយបារម្ភលើវ៉ារ្យង់អូមីក្រុង។ មុនការប្រកាសរបស់លោកនាយករដ្ឋមន្ត្រីជប៉ុននេះ មានតែប្រទេសអ៊ីស្រាអែលតែមួយគត់ដែលហាមឃាត់ជនបរទេសទាំងអស់មិនឱ្យចូលប្រទេសខ្លួន ដែលជាវិធានការដ៏តឹងរឹងបំផុត៕