ប្រធានាធិបតីសហរដ្ឋអាមេរិក លោក ចូ បៃឌិន កាលពីថ្ងៃព្រហស្បតិ៍ បានដាក់ចេញច្បាប់សម្រាប់ការធ្វើដំណើរដ៏តឹងរ៉ឹងជាងច្បាប់មុនៗ ខណៈពេលដែលសហរដ្ឋអាមេរិកបានបញ្ជាក់ថា ខ្លួនបានរកឃើញមេរោគកូវីដ-១៩បំប្លែងខ្លួនថ្មីប្រភេទអូមីក្រុង។
លោក បៃឌិន បានថ្លែងថា ផែនការរបស់លោកមិនរាប់បញ្ចូលការបិទប្រទេសឬវិធានការបិទខ្ទប់ទេ ហើយក៏មិនពង្រីកវិសាលភាពលើកាតព្វកិច្ចចាក់វ៉ាក់សាំងផងដែរ។
ករណីមេរោគប្រភេទអូមីក្រុងត្រូវបានរកឃើញនៅក្នុងរដ្ឋកាលីហ្វ័រញ៉ា ខូឡូរ៉ាដូ មីនីសូតា ញូវយ៉ក និងនៅហាវ៉ៃ ដែលអាជ្ញាធរបាននិយាយថា បុគ្គលទាំងនោះមិនមានប្រវត្តិធ្វើដំណើរនាពេលថ្មីៗនេះទេ។ មន្ត្រីសុខាភិបាលរដ្ឋបានរាយការណ៍ថា អ្នកជំងឺមានរោគសញ្ញាស្រាល។
វ៉ារ្យ៉ង់អូមីក្រុងនេះត្រូវបានរកឃើញនៅតាមបណ្ដាប្រទេសជាង ៣០ នៅជុំវិញពិភពលោក។ នេះបើយោងតាមរបាយការណ៍។
ច្បាប់សម្រាប់ការធ្វើដំណើរថ្មីរបស់សហរដ្ឋអាមេរិកបានកំណត់ឱ្យអ្នកដំណើរអន្តរជាតិទាំងអស់ទាំងអ្នកដែលបានទទួលវ៉ាក់សាំងរួច និងអ្នកមិនទាន់បានទទួលវ៉ាក់សាំង ត្រូវធ្វើតេស្ដរកមេរោគក្នុងអំឡុងរយៈពេល ២៤ ម៉ោងមុនធ្វើដំណើរចូលសហរដ្ឋអាមេរិក។ មនុស្សគ្រប់រូបតម្រូវឱ្យពាក់ម៉ាសនៅលើយន្តហោះ រថភ្លើង និងឡានក្រុងរហូតដល់ខែមីនា។
បន្ថែមពីនេះ សហរដ្ឋអាមេរិកក៏នឹងបន្ដផ្គត់ផ្គង់សម្ភារធ្វើតេស្ដរកមេរោគនៅតាមផ្ទះ តាមរយៈក្រុមហ៊ុនធានារ៉ាប់រងឯកជនសម្រាប់អ្នកដែលមានការធានារ៉ាប់រង និងតាមរយៈមណ្ឌលសុខភាពនិងគ្លីនិកដាច់ស្រយាលសម្រាប់អ្នកដែលមិនមាន៕
