មេដឹកនាំមីយ៉ាន់ម៉ាដែលត្រូវបានបណ្ដេញចេញពីតំណែង លោកស្រី អ៊ុងសាន ស៊ូជី ត្រូវបានតុលាការកាត់ទោសឱ្យជាប់ពន្ធនាគាររយៈពេល ៤ ឆ្នាំ ដែលនេះជាការប្រកាសសាលក្រមទីមួយក្នុងចំណោមការចោទប្រកាន់ជាច្រើនផ្សេងទៀត ដែលកំពុងជំនុំជម្រះ។
លោកស្រីត្រូវបានតុលាការសម្រេចថាមានពិរុទ្ធភាពជុំវិញបទញុះញង់ឱ្យមានការបះបោរនិងបំពានវិធានការកូវីដ ក្រោមច្បាប់គ្រោះធម្មជាតិ។
លោកស្រីបានរងការចោទប្រកាន់រហូតដល់ទៅ ១១ ករណី ហើយលោកស្រីបានច្រានចោលរាល់ការចោទប្រកាន់ដែលបានដាក់មកលើលោកស្រី។
គួរបញ្ជាក់ផងដែរថា មេដឹកនាំវ័យ ៧៦ ឆ្នាំរូបនេះបានដឹកនាំរដ្ឋាភិបាលស៊ីវិលជាប់ឆ្នោត មុនពេលត្រូវបានទម្លាក់ដោយរដ្ឋប្រហារយោធានៅក្នុងខែកុម្ភៈ។ ក្រុមយោធាបានដណ្តើមអំណាចដោយចោទប្រកាន់លោកស្រីថាបានក្លែងបន្លំសន្លឹកឆ្នោតក្នុងការបោះឆ្នោតសកលកាលពីឆ្នាំទៅមិញ។
ចាប់តាំងពីពេលនោះមក លោកស្រី ស៊ូជី ត្រូវបានឃុំខ្លួនក្នុងផ្ទះនិងរងការចោទប្រកាន់ជាច្រើន រួមទាំងអំពើពុករលួយជាច្រើនករណី រំលោភលើកិច្ចការសម្ងាត់ជាតិ និងញុះញង់ឱ្យមានចលាចលសាធារណៈ។
ក្រៅពីការបង្ហាញខ្លួននៅតុលាការក្នុងពេលដ៏ខ្លី សាធារណជនកម្របានឃើញឬដឹងលឺព័ត៌មានពីលោកស្រីផ្ទាល់ណាស់៕
