អាជ្ញាធរបាននិយាយថា រថយន្តកុងទ័រនឺមួយបានជួបគ្រោះថ្នាក់នៅភាគខាងត្បូងប្រទេសម៉ិកស៊ិក ដែលបានបណ្ដាលឱ្យមនុស្សដែលស្ថិតលើរថយន្ដនេះយ៉ាងហោចណាស់ ៥៣ នាក់បានស្លាប់បាត់បង់ជីវិតនិងរាប់សិបនាក់ផ្សេងទៀតបានរងរបួស។
មនុស្សជាង ១០០ នាក់ ដែលត្រូវបានគេដឹងថាជាជនចំណាកស្រុកមកពីតំបន់អាមេរិកកណ្តាល ត្រូវបានកៀបជាប់ក្នុងទូរកុងទ័រនឺ នៅពេលដែលរថយន្ដបានធ្វើដំណើរដល់រដ្ឋ Chiapas ។
រូបភាពពីកន្លែងគ្រោះថ្នាក់ចរាចរណ៍បង្ហាញពីទិដ្ឋភាពជនរងគ្រោះអង្គុយលើផ្លូវក្បែររថយន្តដែលក្រឡាប់ ហើយមានសាកសពគ្របក្រណាត់សនៅក្បែរទីតាំងនោះ។
លោក Luis Manuel Garcia ប្រធានទីភ្នាក់ងារការពារជនស៊ីវិលប្រចាំរដ្ឋ Chiapas បាននិយាយថា វាគឺជាឧបទ្ទវហេតុដ៏អាក្រក់បំផុតមួយនៅក្នុងប្រទេសម៉ិកស៊ិក ដោយយ៉ាងហោចណាស់មនុស្សចំនួន ៥៨ នាក់បានរងរបួស ខ្លះទៀតរងរបួសធ្ងន់ធ្ងរ។
លោកបន្តថា ជនរងគ្រោះមានបុរស ស្ត្រី និងកុមារ។ សញ្ជាតិរបស់ពួកគេមិនត្រូវបានបញ្ជាក់នោះទេ ប៉ុន្តែមន្ត្រីក្នុងតំបន់បាននិយាយថា ភាគច្រើននៃជនរងគ្រោះគឺជាជនចំណាកស្រុកមកពីហុងឌូរ៉ាស និងហ្គាតេម៉ាឡា។
រថយន្តកុងទ័រនឺនេះត្រូវបានគេរាយការណ៍ថា បើកបរក្នុងល្បឿនលឿន នៅពេលដែលវាក្រឡាប់ត្រង់ចំណុចផ្លូវកោង ហើយបានបុកស្ពានសម្រាប់អ្នកថ្មើរជើងនៅលើផ្លូវធំមួយ ដែលឆ្ពោះទៅកាន់រដ្ឋធានី Tuxtla Gutiérrez នៃរដ្ឋ Chiapas ។
គួរបញ្ជាក់ផងដែរថា រដ្ឋ Chiapas ដែលនៅជិតខាងប្រទេសហ្គាតេម៉ាឡាគឺជាចំណុចឆ្លងកាត់ដ៏សំខាន់សម្រាប់ជនចំណាកស្រុកដែលគ្មានឯកសារផ្លូវការ៕
